نۇر-سۇلتاندا جەتىنشى شاقىرىلىمداعى قازاقستان رەسپۋبليكاسى پارلامەنتىنىڭ ءبىرىنشى سەسسياسى وتۋدە. وعان سەنات دەپۋتاتتارى، 10 قاڭتاردا سايلانعان ءماجىلىس دەپۋتاتتارى، سونداي-اق پرەزيدەنت قاسىم-جومارت توقايەۆ قاتىسۋدا.

پرەزيدەنت جاڭا قۇرامداعى ءماجىلىس دەپۋتاتتارىنا تابىس تىلەپ، الداعى ۋاقىتتا قارقىندى جۇمىس ىستەۋدى تاپسىردى.

– سايلاۋ كارانتينگە قاراماستان بەلسەندى ءوتتى. ماجىلىسكە ءوتۋ ءۇشىن كەيبىر پارتيالارعا از عانا داۋىس جەتپەدى. ءبىراق ولار ءارقاشان وزەكتى ماسەلەلەردى بەلسەندى كوتەرەدى. سوندىقتان، ماجىلىسكە ءوتۋدىڭ شەكتى مەجەسىن 7-دەن 5%-عا دەيىن تومەندەتۋ قاجەت دەپ سانايمىن، – دەدى پرەزيدەنت.

بۇعان دەيىن 10 قاڭتار كۇنى بولعان سايلاۋ ناتيجەسى بويىنشا، ءۇش ساياسي پارتيا شەكتى مەجەدەن اسىپ، دەپۋتاتتىق ماندات يەلەنگەن. سايلاۋ ناتيجەسى تومەندەگىدەي بولعان:

Nur Otan پارتياسى – 71،09%؛

"اق جول" پارتياسى –10،95%؛

قازاقستان حالىق پارتياسى – 9،1%؛

"اۋىل" پارتياسى – 5،29%؛

ADAL پارتياسى – 3،57%.