22 قاڭتاردا اتىراۋداعى ۋگ-157/9 مەكەمەسىندە وتكەن كوشپەلى سوت قاماۋداعى بەلسەندى ماكس بوقايەۆقا تۇرمەدەن شىققان سوڭ اكىمشىلىك باقىلاۋ تاعايىنداۋ تۋرالى اتىراۋ وبلىستىق قىلمىستىق اتقارۋ جۇيەسى دەپارتامەنتىنىڭ (قاجد) ءوتىنىشىن قاناعاتتاندىردى. بۇل تۋرالى ازاتتىق راديوسىنا ادۆوكاتى جانار سۇندەتقالييەۆا حابارلادى.
– ماكس اپەللياسيالىق شاعىم تۇسىرەمىز دەدى. سوتتا ماكستىڭ ءوزى "مەن ءوزىمدى ساياسي تۇتقىنمىن دەپ سانايمىن. كىنالىمىن دەپ ەسەپتەمەيمىن. قوعامدىق ۇيىمدار، حالىقارالىق ۇيىمدار، مىڭداعان ادام ءىسىمنىڭ ساياسيلانعانىن بىلەدى. دەپارتامەنتتىڭ ءوتىنىشى دە مەنى ساياسي كوزقاراسىما بايلانىستى قۋدالاپ جاتقانىن دالەلدەي تۇسەدى" دەپ ايتتى، – دەدى ادۆوكات.
پروكۋرور سوتتا اتىراۋ وبلىستىق قىلمىستىق اتقارۋ جۇيەسى دەپارتامەنتىنىڭ ءوتىنىشىن قولداپ، بوقايەۆتىڭ "ەكسترەميستىك سيپاتى بار قىلمىس بويىنشا" جازالانىپ جاتقانىن العا تارتىپ، تۇتقىننىڭ بۇعان دەيىن مەكەمەدە ەرەجە بۇزعانىن دا ايتقان. ال ومىرتقاسىندا "گرىجاسى" بارىن ايتقان بوقايەۆ باسقا مەكەمەدە جازاسىن وتەگەن كەزدە تۇرمە قىزمەتكەرلەرىنىڭ بەلى اۋىرىپ تۇرعانىنا قاراماستان تاڭەرتەڭ ايازدا جاتتىعۋ جاساۋعا ماجبۇرلەگەنىن جەتكىزگەن. سوعان شاعىمدانعان كەزدە "ەرەجە بۇزدى" دەپ ايىپتالعان.
– ول "سىزدەر دەسانت دايىندامايسىزدار عوي، مەن سىرتتا ەمەس، ىشتە جاتتىعۋ جاسايمىن" دەپ سىرتقا شىعۋدان باس تارتقان كەزدە "ەرەجە بۇزدى" دەپ ايىپتاعان. ماكستىڭ ادۆوكاتى "قازگيدرومەتكە" حابارلاسىپ، اۋا رايىن سۇراعان. ارتىنشا بوقايەۆ سىرتقا شىعۋدان باس تارتقان كۇنى سىرتتا -26 -27 گرادۋس بولعانى انىقتالعان. ال تۇرمە ەرەجەسى بويىنشا ەگەر تەمپەراتۋرا -25-تەن اسسا، وندا سىرتقا شىعارماۋى ءتيىس بولعان. سول سەبەپتى بوقايەۆ ول تالاپپەن كەلىسپەگەن. ونى سول ءۇشىن "ەرەجە بۇزدى" دەپ ايىپتاعان، – دەيدى ادۆوكات.
ازاتتىق ءتىلشىسى ازىرگە اتىراۋ وبلىستىق قىلمىستىق-اتقارۋ جۇيەسىنەن جاۋاپ الا المادى.
بۇعان دەيىن سوتتىڭ ونلاين تۇردە وتەتىنى، وعان جان-جاقتان باقىلاۋشىلار مەن اقپارات قۇرالدارى قاتىسا الاتىنى حابارلانعان. ءبىراق كەيىنىرەك سوت "ينتەرنەت بايلانىسى ناشار" دەپ پروسەستى تۇرمەنىڭ وزىندە وتكىزۋگە ۇيعارعان. وعان باقىلاۋشىلار قاتىسقان جوق.
ماكس بوقايەۆتىڭ جازاسىن وتەۋ ۋاقىتى 4 اقپاندا اياقتالادى.
48 جاستاعى ماكس بوقايەۆ 2016 جىلعى قاراشادان بەرى تۇرمەدە وتىر. بەس جىل بۇرىن، 24 ساۋىردە اتىراۋدا مىڭداعان ادام الاڭعا جينالىپ، جەردى شەتەلدىكتەرگە جالعا بەرۋگە قارسىلىق بىلدىرگەن. اتىراۋدا باستالعان نارازىلىق كەيىن ەلدىڭ باسقا ايماقتارىندا دا جالعاسىپ، بيلىك جەردى شەتەلدىكتەرگە جالعا بەرۋگە ۋاقىتشا موراتوريي جاريالاعان.
جەر رەفورماسىنا قارسى ميتينگىدەن سوڭ وعان قاتىسقان اتىراۋلىق بەلسەندىلەر – ماكس بوقايەۆ پەن تالعات ايان بەس جىلعا سوتتالدى. ولار "الەۋمەتتىك ارازدىق تۋدىردى"، "جالعان اقپارات تاراتتى" جانە "ميتينگ وتكىزۋ زاڭدارىن بۇزدى" دەپ ايىپتالدى. سوت 2018 جىلى ساۋىردە اياننىڭ ءوتىنىشى بويىنشا ونى قاماۋدان بوساتقان. 2019 جىلعى شىلدەدە اتىراۋداعى №2 قالالىق سوتى تالعات اياندى جازادان تولىق بوساتتى. ماكس بوقايەۆ "قاماۋدان ۋاقىتىنان بۇرىن شىعۋعا سۇرانبايتىنىن، ءوزىن تولىق اقتاۋدى تالاپ ەتەتىنىن" مالىمدەگەن.
پىكىر قالدىرۋ