"وتباسى بانكى" ءبىرىڭعاي جيناقتاۋشى زەينەتاقى قورىنان زەينەتاقىنىڭ شەكتى مولشەرىن الۋعا كەلىپ تۇسكەن وتىنىشتەردىڭ قانشاسى ماقۇلدانعانى تۋرالى اقپارات جاريالادى.

بانك اقپاراتىنشا، قازىرگى ۋاقىتتا 22 300 ادامنىڭ ءبىرجولعى زەينەتاقى تولەمدەرىن الۋ تۋرالى وتىنىشتەرى ماقۇلدانعان.

"وتباسى بانكى" 23 قاڭتاردان باستاپ ءبىرىڭعاي جيناقتاۋشى زەينەتاقى قورىنان تولەنەتىن ءبىرجولعى زەينەتاقى تولەمدەرىن پايدالانۋعا ءوتىنىش تاپسىرا الاتىن ارنايى ونلاين پلاتفورمانى ىسكە قوسقان. 

ءوتىنىمدى نوۋتبۋك/كومپيۋتەر ارقىلى جولداۋعا بولادى. سمارتفون ارقىلى ءوتىنىم بەرىلمەيدى. ءوتىنىمدى جولداۋ ءۇشىن ەسق بولۋى كەرەك.

2 قاڭتار كۇنى پرەزيدەنت قاسىم-جومارت توقايەۆ ازاماتتارعا زەينەتاقى جيناعىنىڭ ءبىر بولىگىن مەرزىمىنەن بۇرىن پايدالانۋعا مۇمكىندىك بەرەتىن زاڭعا قول قويعان.

ازاماتتار وزدەرىنىڭ زەينەتاقى جيناقتارىنىڭ ءبىر بولىگىن تومەندەگىدەي ماقساتتارعا پايدالانا الادى:

♦ كەپىلدىك بولعان كەزدە تۇرعىن ءۇي قۇرىلىسىنا ۇلەستىك قاتىسۋ تۋرالى شارتتار بويىنشا تۇرعىن ءۇي ساتىپ الۋ كەزىندە نەمەسە اكت بولعان كەزدە كوپپاتەرلى تۇرعىن ۇيدەگى ۇلەستى بەرۋ تۋرالى شارت جاساسۋ كەزىندە؛

♦ جەر ۋچاسكەسىن ساتىپ الۋدى قوسا العاندا جەكە تۇرعىن ءۇي سالۋ ءۇشىن تولىق ەسەپ ايىرىسۋ كەزىندە؛

♦ يپوتەكا الۋ، تۇرعىن ءۇيدى ساتىپ الۋ، بەرەشەكتى وتەۋ، بانكتەر ارقىلى يپوتەكانى قايتا قارجىلاندىرۋ ءۇشىن باستاپقى جارنا رەتىندە؛

♦ تۇرعىن ءۇي قۇرىلىسى جيناقتارى جۇيەسى بويىنشا جەر ۋچاسكەسىن ساتىپ الا وتىرىپ، تۇرعىن ءۇي ساتىپ الۋعا نەمەسە جەكە تۇرعىن ءۇي سالۋعا ارنالعان يپوتەكا بويىنشا بەرەشەكتى الۋ، قايتا قارجىلاندىرۋدى وتەۋ كەزىندە؛

♦ يسلام بانكىنىڭ قارجىلاندىرۋى شەڭبەرىندە ءۇي ساتىپ الۋ جانە وسىنداي قارجىلاندىرۋ بويىنشا بەرەشەكتى وتەۋ كەزىندە؛

♦ تۇرعىن ءۇي قۇرىلىسى جانە داعدارىسقا قارسى باعدارلامالار شەڭبەرىندە ساتىپ الۋ قۇقىعىمەن بەرىلگەن باسپانانى ۇزاق مەرزىمدى جالداۋ شارتتارى بويىنشا بەرەشەكتى وتەۋ ءۇشىن پايدالانۋىنا رۇقسات ەتىلەدى.

جيناقتىڭ ءبىر بولىگىن پايدالانۋ ءۇشىن قورداعى جينالعان سوما ازاماتتاردىڭ جاس ەرەكشەلىگىنە قاراي بەلگىلەنگەن شەكتەن اسۋعا ءتيىس.