پرەزيدەنت، قارۋلى كۇشتەردىڭ جوعارعى باس قولباسشىسى قاسىم-جومارت توقايەۆ قورعانىس ءمينيسترى نۇرلان ەرمەكبايەۆتى قابىلدادى، دەپ حابارلادى اقوردا سايتى.
نۇرلان ەرمەكبايەۆ توقايەۆقا قازاقستان ارمياسىنىڭ زاماناۋي قارۋ-جاراقتارمەن جانە تەحنيكامەن جابدىقتالۋى، ينفراقۇرىلىمدىق دامۋى، سيفرلاندىرىلۋى، اقپاراتتىق قاۋىپسىزدىكتىڭ قامتاماسىز ەتىلۋى جانە بىتىمگەرشىلىك بولىمدەردىڭ دايىندىعى تۋرالى ايتتى.
قورعانىس ءمينيسترى دامىعان مەملەكەتتەر ارمياسىنىڭ قۇرىلىمىنا جاسالعان تالداۋ جۇمىستارىن ەسكەرە وتىرىپ، قورعانىس مينيسترلىگى "ارميانى جاڭعىرتۋ" جوباسىن ۇسىناتىنىن حابارلادى. ۇلتتىق جوبانىڭ جۇزەگە اسىرىلۋى ارميانىڭ اسكەري الەۋەتىن ارتتىرۋعا، بەلگىلى ءبىر دارەجەدە الەۋمەتتىك-ەكونوميكالىق تيىمدىلىگىن قامتاماسىز ەتۋگە زور مۇمكىندىك بەرەتىنىن اتاپ ءوتتى.
سونىمەن قاتار ول پرەزيدەنتكە بەيبىتشىلىكتى قولداۋ وپەراسيالارىنا قاتىساتىن اسكەري قىزمەتشىلەردىڭ دايىندىعى تۋرالى اقپارات بەردى.
نۇرلان ەرمەكبايەۆتىڭ ايتۋىنشا، پرەزيدەنت قاسىم-جومارت توقايەۆتىڭ تاپسىرمالارىن ىسكە اسىرۋ اياسىندا بۇۇ ميسسياسى باعىتىنداعى قىزمەتتە مەيلىنشە سۇرانىسقا يە اسكەري-مەديسينالىق، ينجەنەرلىك، بارلاۋ جانە اسكەري پوليسيا سياقتى بولىمدەردىڭ دايىندىعى پىسىقتالۋدا.
كەزدەسۋ سوڭىندا جوعارعى باس قولباسشى قارۋلى كۇشتەردىڭ اسكەري الەۋەتىن ارتتىرۋعا جانە قازىرگى سىن-قاتەرلەر مەن قاۋىپتەردى ەسكەرە وتىرىپ، ولاردى ساپالى دامىتۋعا، ارميانى جابدىقتاۋعا، قازاقستاندا قارۋ-جاراقتىڭ بىرنەشە ءتۇرىن شىعاراتىن قورعانىس-ونەركاسىپتىك كەشەنىمەن ىقپالداستىق ورناتۋعا، سونداي-اق، قارۋلى كۇشتەردى سيفرلاندىرۋعا قاتىستى ءبىرقاتار تاپسىرما بەردى.
پىكىر قالدىرۋ