رەسەي استاناسى ماسكەۋدە جاۋعان قار ەكىنشى تاۋلىك قاتارىنان مەتەوباقىلاۋ تاريحىنداعى رەكوردتاردى جاڭارتۋدا. جۇما مەن سەنبىدە قالاعا 30 سم-دەن استام قار جاۋعان. كەي جەردەردە قار قالىڭدىعى 60 سم-گە جەتكەن. قالا مەرىنىڭ ورىنباسارى پەتر بيريۋكوۆتىڭ ايتۋىنشا، قاردى تازالاۋعا 5 تاۋلىك كەتەدى، دەپ جازادى bbc.com.
ماسكەۋ تۇبىندەگى كرەست دەريەۆنياسىندا ءبىر ادام انگار شاتىرىنان قۇلاعان قاردىڭ استىندا قالىپ مەرت بولدى.
ال ەل استاناسىندا جالپى ۇزىندىعى 1000 شاقىرىمنان استانىن ۇزىن-سونار كولىك كەپتەلىسى پايدا بولدى. كولىگىندە قالىپ قويعان جۇرگىزۋشىلەر ءۇشىن قالانىڭ 40 جەرىندە جىلىنىپ، جۇرەك جالعاپ الاتىن ورىندار اشىلدى.
قالا باسشىلىعى ازاماتتاردى جەكە كولىك قۇرالدارىمەن جۇرمەۋگە، تەك قوعامدىق كولىكپەن قاتىناۋعا شاقىرۋدا.
ماسكەۋ اۋەجايلارىندا 140-قا جۋىق رەيس كەشىگىپ، 20-سى كەيىنگە قالدىرىلدى. سينوپتيكتەر دۇيسەنبىدەن باستاپ 25-30 گرادۋستىق اياز بولاتىنىن حابارلادى.
قالانى قاردان تازالاۋعا 70 مىڭ ادام، 14 مىڭعا جۋىق تەحنيكا جۇمىلدىرىلۋدا.
پىكىر قالدىرۋ