الماتى كولىك حولدينگى جوندەۋ جۇمىستارىنا بايلانىستى 28 اقپان كۇنى قالانىڭ ەكى ايماعىندا قوعامدىق كولىك قوزعالىسىنا وزگەرىس ەنەتىنىن حابارلادى. بەلگىلەنىپ وتىرعان جەرلەرگە 28 اقپاندا بەلسەندى جانبولات ماماي باستاعان دەموكراتيالىق پارتيا باستاماشىل توبى مەن "باسە" youtube ارناسى، سونداي-اق شەتەلدەگى وپپوزيسيونەر مۇحتار ءابليازوۆ جەتەكشىلىك ەتەتىن قازاقستاننىڭ دەموكراتيالىق تاڭداۋى قوزعالىسى ميتينگ وتكىزەتىنىن مالىمدەگەن.

"جوندەۋ جۇمىستارى ءۇشىن جابىلادى" دەلىنگەن ورىننىڭ ءبىرى دەموكراتيالىق پارتيا باستاماشىل توبى مەن "باسە" youtube ارناسى ميتينگ ورنى دەپ جاريالاعان بالۋان شولاق اتىنداعى سپورت سارايىنىڭ ماڭى.

الماتى كولىك حولدينگى تاراتقان اقپاراتتىق حابارلامادا اباي داڭعىلى بويىنشا شىعىس جانە باتىس باعىتتا ورنالاسقان "ورتالىق ستاديون" ايالداما كەشەندەرىندە جۇرگىزىلگەن جوندەۋ جۇمىستارىنا بايلانىستى بارلىق قوعامدىق كولىك مارشرۋتتارى ءۇشىن ايالداۋعا تىيىم سالىناتىنى ايتىلادى.

وسى مارشرۋت بويىنشا جۇرەتىن بارلىق اۆتوبۋس باعىتتارى اباي داڭعىلى بويىمەن باتىس باعىتتا "اۋەزوۆ اتىنداعى تەاتر"، شىعىس باعىتتا "اباي-بايتۇرسىنوۆ" ايالداماسىندا توقتايدى.

ال مۇحتار ءابليازوۆ جاقتاستارى جينالاتىن ورتالىق ساياباق ماڭىنداعى گوگول كوشەسىنىڭ قايىربەكوۆ-بۇزىربايەۆ كوشەلەرىنىڭ اراسىندا "تروللەيبۋس جەلىلەرىن جوندەۋ جۇمىستارى جۇرەتىنى" سەبەپتى تروللەيبۋس جانە اۆتوبۋس مارشرۋتتارىنىڭ سحەمالارى وزگەرەدى.

حابارلاماعا سايكەس، وسى جەردە قاتىنايتىن قوعامدىق كولىك قوزعالىستارىنا تومەندەگىدەي وزگەرىس ەنەدى:

№25 تروللەيبۋس – قالداياقوۆ – جىبەك جولى – پۋشكين – گوگول – قالداياقوۆ كوشەلەرىنىڭ سولتۇستىك باعىتىندا جانە ءارى قاراي باعىت بويىنشا؛

№1، 12 تروللەيبۋستارى گوگول – قالداياقوۆ – جىبەك جولى – پۋشكين كوشەسىنىڭ شىعىس باعىتىندا جانە ودان ءارى باعىت بويىنشا.

№ 13 اۆتوبۋس – قالداياقوۆ ك-سى – قازىبەك بي ك-سى – قايىربەكوۆ ك-سى – گوگول ك-سى – ودان ءارى قولدانىستاعى سىزبا بويىنشا.

№16 اۆتوبۋس – قالداياقوۆ ك-سى – قازىبەك بي ك-سى – قايىربەكوۆ ك-سى – گوگول ك-سى – بۇدان ءارى قولدانىستاعى سىزبا بويىنشا؛

№118 اۆتوبۋس – قالداياقوۆ ك-سى – ماقاتايەۆ ك-سى (كەرى باعىتتا كوپەرنيك ك-سى ايالداماسىنداعى بۇرىلىس) – قالداياقوۆ ك-سى – بۇدان ءارى قولدانىستاعى سىزبا بويىنشا تۋرا جانە كەرى باعىتتا؛

بۇعان دەيىن دەموكراتيالىق پارتيا باستاماشىل توبى مەن "باسە" youtube ارناسى ازاماتتاردى جەكسەنبى، 28 اقپان كۇنى 12:00-دە الماتىداعى بالۋان شولاق اتىنداعى سپورت سارايىنىڭ الدىنا ميتينگكە شىعۋعا شاقىرعان. تالاپتارى – نەسيە امنيستياسىن جاريالاۋ، جەر شەتەلدىكتەرگە جالعا بەرىلمەسىن، ءار وتباسىعا لايىقتى باسپانا، ەۋروپارلامەنت قارارى ورىندالسىن!

سونداي-اق قازاقستاننىڭ دەموكراتيالىق تاڭداۋى قوزعالىسىنىڭ وكىلدەرى دە وسى كۇنى الماتىدا ورتالىق ساياباق ماڭىندا ساعات 13:00-دە ميتينگكە شىعاتىندارىن ءمالىم ەتكەن. ولار ساياسي تۇتقىندارعا بوستاندىق تالاپ ەتپەك.