اقتاۋدا ەكى ادام كورشىسى جاندىكتەردى ۋلاعاننان كەيىن قايتىس بولدى. بۇل تۋرالى ماڭعىستاۋ وبلىسىنىڭ قوعامدىق كوممۋنيكاسيا ورتالىعى حابارلادى.
ورتالىق مالىمەتىنشە، اقتاۋ قالاسىنىڭ تۇرعىنى "كۆيكفوس" پرەپاراتىمەن (جاندىكتەرگە قارسى پرەپارات) كورشىلەرىنە ەسكەرتپەستەن ءوز پاتەرىن دەزينفەكسيالاعان.
"پاتەرىن زالالسىزداندىرىپ بولعان سوڭ، ءۇيىن كىلتتەپ باسقا شاعىناۋدانعا كەتكەن. كەيىن كورشىلەرىنىڭ دەنساۋلىعى ناشارلاي باستاعان. سالدارىنان كورشى ايەل مەن قىزى كوز جۇمدى" دەلىنگەن حابارلامادا.
سونداي-اق تاعى 6 ادام شۇعىل تۇردە اۋرۋحاناعا جاتقىزىلعان.
اتالعان ءىس بويىنشا سوت-مەديسينالىق ساراپتاما تاعايىندالدى. وسى فاكت اقتاۋ قالاسىنىڭ پوليسيا باسقارماسىنا قىلمىستىق كودەكستىڭ 304-بابى 3-بولىمىنە سايكەس تىركەلدى.
قازىرگى تاڭدا اقتاۋ قالاسىنىڭ پوليسيا باسقارماسى پاتەرىن دەزينفەكسيالاعان تۇرعىننىڭ جەكە باسىن انىقتادى. قىلمىستىق ءىس بويىنشا سوتقا دەيىنگى تەرگەۋ ءجۇرىپ جاتىر.
پىكىر قالدىرۋ