پرەزيدەنت قاسىم-جومارت توقايەۆ قازاقستاندىقتاردى حالىقارالىق ايەلدەر كۇنىمەن قۇتتىقتادى، دەپ حابارلادى اقوردا سايتى.
"قۇرمەتتى حانىمدار!
بارشاڭىزدى حالىقارالىق ايەلدەر كۇنىمەن شىن جۇرەكتەن قۇتتىقتايمىن!
كوكتەمنىڭ شۋاقتى مەرەكەسى قاشاندا جۇرەگىمىزدى سۇيىسپەنشىلىك پەن ىزگىلىككە، مەيىرىم مەن شاپاعاتقا بولەيدى.
ءبىز جىل سايىن وسى كۇنى ادامزاتقا اسەمدىك سىيلايتىن ايەلدەر قاۋىمىنا ءىقىلاس-ىلتيپاتىمىزدى ءبىلدىرىپ، اق تىلەك ارناۋعا اسىعامىز. سىزدەردىڭ مەملەكەت جانە قوعام ومىرىندە الاتىن ورىندارىڭىز ايرىقشا. "ايەل ءبىر قولىمەن بەسىكتى تەربەتسە، ەكىنشى قولىمەن الەمدى تەربەتەدى" دەگەن ناقىل ءسوز بەكەر ايتىلماعان" دەلىنگەن حابارلامادا.
سونداي-اق توقايەۆ ەلدە ايەلدەردىڭ ەكونوميكا، ساياسات پەن قوعامدىق قىزمەتتەگى ءرولى ارتىپ كەلە جاتقانىن ايتتى.
"ەلىمىز ايەلدەردىڭ الەۋەتىن تولىق تانىتۋىنا جول اشىپ، ولاردىڭ قۇقىعىن قورعاۋعا جانە تۇرمىس جاعدايىن جاقسارتۋعا باسا ءمان بەرەدى. مەملەكەتتىڭ جۇيەلى قولداۋ كورسەتۋىنىڭ ارقاسىندا قىز-كەلىنشەكتەردىڭ ەكونوميكاداعى، ساياسات پەن قوعامدىق قىزمەتتەگى ءرولى جىل وتكەن سايىن ارتا تۇسۋدە.
تاۋەلسىزدىك كەزەڭىندە ايەلدەردىڭ ءتۇرلى سالادا تولاعاي تابىسقا جەتكەنىنە ءبارىمىز كۋامىز. سىزدەردىڭ جەتىستىكتەرىڭىز جۇرتتى جىگەرلەندىرىپ، جاڭا بيىكتەرگە جەتەلەيدى، جاستارعا ۇلگى-ونەگە بولادى.
ءارقايسىڭىزدىڭ بەلسەندى ازاماتتىق ۇستانىمدارىڭىز قوعامداعى كوپتەگەن وزەكتى ماسەلەنى ۇتىمدى شەشۋگە جانە ەلىمىزدى جان-جاقتى دامىتۋعا ىقپال ەتەدى.
قازاقستان ايەلدەرىنىڭ اقىل-پاراساتى، ەرىك-جىگەرى مەن جاسامپازدىعى بارلىق قيىندىقتى ەڭسەرىپ، سىن-قاتەرلەرگە توتەپ بەرۋىمىزگە سەپتىگىن تيگىزۋدە.
بارشاڭىزعا زور دەنساۋلىق پەن باق-بەرەكە تىلەيمىن!" دەلىنگەن پرەزيدەنت قۇتتىقتاۋىندا.
پىكىر قالدىرۋ