دەنساۋلىق ساقتاۋ ءمينيسترى الەكسەي سوي مەرەكە قارساڭىندا قازاقستاندىقتارعا ۇندەۋ جولدادى.
"مەرەكەلىك دەمالىس كۇندەرى قارساڭىندا تاعى دا ەستەرىڭىزگە سالا كەتكىم كەلەدى. كۇز بەن كوكتەمدە ءجىتى رەسپيراتورلىق ۆيرۋستىق ينفەكسيا (رينوۆيرۋس، ادەنوۆيرۋس، پاراگريپپ ۆيرۋس جانە باسقالارى) اسقىنادى. ءقازىر جرۆي ماۋسىمى جالعاسۋدا، سوندىقتان سىرقاتتانۋ ءقاۋىپى سەيىلگەن جوق.
قىركۇيەك پەن قاڭتار ارالىعىندا ەلىمىزدە تارالعان كۆي ۆيرۋسىن گەنومدىق زەرتتەۋ ناتيجەسى بويىنشا كوروناۆيرۋستىڭ ("بريتانيالىق"، "وڭتۇستىك افريكا"، "برازيليالىق") جاڭا شتامى انىقتالعان جوق. الايدا حالىقارالىق اۋە قاتىناسى قايتا اشىلعانىن، شەتەلگە شىعاتىن ەل ازاماتتارى (ەڭبەك كوشى-قونى، وقىتۋ، ەمدەلۋ، تۋريزم)، سونداي-اق جاقىن جانە الىس شەتەلدەردەن كەلگەندەردىڭ قاتارى كوبەيگەنىن ەسكەرگەن ءجون.
ياعني، كوروناۆيرۋس ينفەكسياسىنىڭ جاڭا شتاممدارىن تاسىمالداۋ ءقاۋپى دە ارتادى دەگەن ءسوز. الەۋمەتتىك-ەكونوميكالىق نىساندارداعى شەكتەۋ شارالارىنىڭ جەڭىلدەتىلۋى، حالىقتىڭ بەلسەندىلىگى (الەۋمەتتىك اراقاشىقتىق، ماسكا تاعۋ رەجيمى جانە ت.ب. ساقتالمايدى) كوروناۆيرۋس ينفەكسياسىنىڭ تارالۋ ءقاۋپىن ۇدەتۋى مۇمكىن.
COVID-19 جۇقتىرعان ناۋقاستاردا يممۋنيتەت پاسيەنتتىڭ جاسىنا قاراي قالىپتاسادى: يممۋنيتەت بالالاردا جاقسى داميدى – كامەلەتكە تولماعاندار اراسىندا يممۋنيتەت شامامەن 20% بولادى. 18-دەن اسقان ادامداردا – 14%، 65 جاستان اسقانداردا – 11%. 40%-ىندا يممۋنيتەت وتە ءالسىز جانە ينفەكسيا قايتالانعاندا كومەكتەسە المايدى.
يممۋنيتەتتىڭ ساقتالۋ ۇزاقتىعىنا قاتىستى عىلىمي دالەلدەنگەن دەرەك جوق، سوندىقتان Covid-19-دان ساۋىققان ادامداردا اۋرۋدى قايتا جۇقتىرۋ مۇمكىندىگى كۇن سايىن ارتىپ كەلەدى.
كارانتينگە كوروناۆيرۋس ينفەكسياسىنا قارسى ۆاكسيناسيا عانا بالاما بولا الادى. ەگەر حالىق جاپپاي كۆي-گە قارسى پروفيلاكتيكالىق ەكپە سالدىرسا، ۇجىمدىق يممۋنيتەت قالىپتاسادى جانە ينفەكسيانىڭ تارالۋىن توقتاتۋعا مۇمكىندىك تۋادى" دەپ جازدى جەلىدەگى جازباسىندا.
پىكىر قالدىرۋ