پاۆلوداردا اتا-اناسى قان قۇيۋدان باس تارتقان نارەستە ءبىر كۇن عانا ءومىر ءسۇردى، دەپ حابارلادى Pavlodarnews.kz سايتى.

سايت مالىمەتىنشە، نارەستە 2021 جىلى 22 قاڭتاردا دۇنيەگە كەلگەن. شالا تۋعان نارەستەنىڭ سالماعى – 700 گرامم. مەديسينا كورسەتكىشتەرى بويىنشا وعان شۇعىل قان قۇيۋ قاجەت بولعان. الايدا جاس انا ءدىني سەنىمدەرىنە بايلانىستى قان قۇيۋدان باس تارتقان. پاۆلودارلىق دارىگەرلەر بىرنەشە ساعات بويى ونى كوندىرۋگە تىرىسسا دا، ناتيجە شىقپاعان.

ايەل قان قۇيۋدان باس تارتۋى سالدارىنان بالانىڭ ومىرىنە تىكەلەي ءقاۋىپ تونسە دە، شەشىمىن وزگەرتپەيتىنىن جازىپ بەرگەن.

باسىلىم مالىمەتىنشە، جاس انا "قان قۇيۋ ارقىلى جۇقتىرۋ جانە اسقىنۋ ءقاۋپى بارىن" العا تارتىپ، پروسەدۋراعا قارسى ەكەنىن ايتقان. الايدا ول بالاما ەمدەۋ ادىستەرىنە كەلىسكەن.

ەگەر اتا-انالاردى سەندىرۋ مۇمكىن بولماسا جانە بالانىڭ ومىرىنە ءقاۋىپ تونسە، وندا كونسيليۋم جينالادى. وندا پروسەدۋرانى تۋىستارىنىڭ ەركىنە قايشى جۇرگىزۋدى شەشۋى مۇمكىن. ءبىراق بۇل وڭاي ەمەس. "حالىق دەنساۋلىعى جانە دەنساۋلىق ساقتاۋ جۇيەسى تۋرالى" كودەكسكە جانە دەنساۋلىق ساقتاۋ ءمينيسترىنىڭ بۇيرىعىنا سايكەس دارىگەرلەر گەموگلوبيندى بالاما تۇردە ارتتىرا الادى.

– ءيا، ەريتروپوەتين بار. يەھوۆا كۋاگەرلەرى بۇل تۋرالى بىلەدى. ءبىراق بۇل پرەپارات جەدەل قان جوعالتۋ كەزىندە قولدانىلمايدى، – دەدى نەوناتولوگ دارىگەر، وبلىستىڭ پەريناتالدىق ورتالىق باس دارىگەرىنىڭ ورىنباسارى جاڭىلاي قاپانوۆا.

پاۆلودار اۋرۋحاناسىندا جاس انا قان قۇيۋعا كەلىسىم بەرمەگەندىكتەن، پوليسياعا قوڭىراۋ شالىپ، كونسيليۋم وتكىزدى. الايدا قان قۇيۋعا ۋاقىت جەتپەي، نارەستە قايتىس بولدى.