الماتىدا شەتەلدىك قىلمىستىق توپ وكىلدەرى ۇستالدى. بۇل تۋرالى ۇلتتىق قاۋىپسىزدىك كوميتەتىنىڭ رەسمي سايتى حابارلادى.
"3 ەر ادام، ولاردىڭ ەكەۋى تاجىكستان جانە بىرەۋى گرۋزيا ازاماتى قالا كاسىپكەرلەرىنە قاتىستى اۋىر جانە اسا اۋىر قىلمىستار جاساۋعا دايىندالۋ كەزىندە ۇستالدى. قىلمىستارىن ىسكە اسىرۋ ءۇشىن تۇقت مۇشەلەرى شەكارانى زاڭسىز كەسىپ ءوتىپ، قازاقستان اۋماعىندا استىرتىن بولعان" دەلىنگەن حابارلامادا.
ۇستاۋ بارىسىندا 2 جاۋىنگەرلىك تاپانشا، 1 كەلتە مىلتىق، ولارعا وق-دارىلەر، بىرنەشە سۋىق قارۋ جانە باسقا دا قارۋ-جاراق پەن قىلمىس جاساۋ قۇرالدارى تابىلىپ، الىندى.
قىلمىسكەرلەر الماتى قالاسىندا تاجىك دياسپوراسىنىڭ كاسىپكەرلەرىنە تيەسىلى لومباردتارعا، ايىرباستاۋ پۋنكتتەرى مەن تۇرعىن ۇيلەرگە ءبىرقاتار قاراقشىلىق شابۋىل جاساۋ جانە ۇرلاۋ ءۇشىن تۇراقتى قىلمىستىق توپ قۇرۋدى، سونداي-اق ولاردان تۇراقتى نەگىزدە اقشالاي قاراجات الۋ ءۇشىن ولاردى "قامقورلىققا الۋدى" رەتتەپ قويۋدى جوسپارلاعان.
2019 جىلى قىلمىسكەرلەردىڭ ءبىرى قازاقستاننىڭ قۇقىق قورعاۋ ورگاندارى تاراپىنان جاۋاپقا تارتىلىپ، ەلدەن شىعارىلعان. ۇستالعاندار بۇرىن بىرنەشە مارتە سوتتالعان جانە "ۇرىلار قاۋىمداستىعىنىڭ" ارەكەتىنە قاتىستارى بولعان.
وولاردىڭ ءبىرى رەسەيدە كىسى ءولتىرۋ بويىنشا جازاسىن وتەگەن. ەكەۋىنىڭ قىلمىستىق ورتادا "ۇمتىلۋشىلار" (زاڭداعى ۇرىلارعا كانديداتتار) مارتەبەسى بار جانە "زاڭداعى ۇرىلار" ازيز باتۋكايەۆپەن ("ازيز")، ديەۆيد گەرليانيمەن ("داتو سۆان"، 2017 جىلى ۇقك جاۋاپقا تارتقان) جانە باسقالارمەن بايلانىستا بولعان.
قازىرگى ۋاقىتتا ۇستالعاندارعا قاتىستى قىلمىستىق كودەكستىڭ 287-بابى 3-تارماعى (قارۋدى زاڭسىز ساقتاۋ) بويىنشا قىلمىستىق ءىس قوزعالدى. قىلمىستىق كودەكستىڭ 392-بابى (مەملەكەتتىك شەكارانى قاساقانا زاڭسىز كەسىپ ءوتۋ) بويىنشا قىلمىستىق ءىس قوزعاۋ تۋرالى ماسەلە قارالدى.
پىكىر قالدىرۋ