13 ناۋرىزدا الماتىنىڭ باس سانيتار دارىگەرى جانداربەك بەكشيننىڭ جاڭا قاۋلىسى كۇشىنە ەنەدى. ول بويىنشا جاڭا شەكتەۋ شارالارى ەنگىزىلەدى.

13، 14 ناۋرىز كۇندەرى قوعامدىق كولىك، ونىڭ ىشىندە مەترو قىزمەتىنە، قالاارالىق، وبلىسارالىق تۇراقتى اۆتوبۋستار مەن ميكرواۆتوبۋستاردىڭ قاتىناۋىنا تىيىم سالىنادى. 

تاماقتانۋ ورىندارى 50 پايىز سىيىمدىلىقتى ساقتاي وتىرىپ، كەلۋشىلەر سانىن 30 ادامنان اسىرماي 09.00 مەن 20.00-گە دەيىن، ساۋدا ۇيلەرىندەگى فۋدكورلار مەن تاماقتانۋ ورىندارى وزىمەن الىپ كەتۋ، جەتكىزۋ قىزمەتى ارقىلى تاڭعى 10.00-دەن تۇنگى 24.00-گە دەيىن ىستەيدى.

الداعى سەنبى-جەكسەنبىدە ساۋدا ويىن-ساۋىق ورتالىقتارىنىڭ، جابىق بازارلاردىڭ، سپورت كەشەندەرىنىڭ، سپورت-ساۋىقتىرۋ ورتالىقتارى مەن فيتنەس ورتالىقتاردىڭ، ساۋنا، سپا-ورتالىقتاردىڭ قىزمەتى توقتاتىلادى. سونداي-اق سيرك، كاراوكە، تۇنگى كلۋبتار، بۋكمەكەرلىك كونتورلار، ساۋدا ۇيلەرىندەگى بالالارعا ارنالعان ويىن الاڭدارى مەن باتۋتتار قىزمەتىنە، بۇقارالىق شارالار، جينالىستار وتكىزۋگە، جۇما نامازىن وقۋعا تىيىم سالىنادى.

جەكسەنبى اشىق بازارلار جۇمىسى توقتايدى.

سپورتتىق شارالاردىڭ جانكۇيەرسىز وتكىزۋگە رۇحسات. قوعامدىق مونشا قىزمەتى دە شەكتەلمەيدى. 

Ashyq پيلوتتىق جوباسىنا ەنگەن بيليارد، بوۋلينگ، كومپيۋتەر كلۋبتارى، مۋزەي مەن كىتاپحانا، زووباق قىزمەتىن جالعاستىرادى. شىمبۇلاق، كوكتەبە قوناقتاردى قابىلداي بەرەدى.