پرەمەر-مينيستردىڭ باسپا ءسوز قىزمەتى "قازاقستان" ۇلتتىق ارناسىنىڭ بۇرىنعى ءجۋرناليسى ەربول ماندىبەكتىڭ الەۋمەتتىك جەلىدە قىزۋ تالقىعا ءتۇسىپ جاتقان جازباسىنا بايلانىستى پىكىر ءبىلدىردى. جۋرناليست پرەمەر-مينيستر مەن ۆيسە-پرەمەرلەردىڭ، سەنات پەن ءماجىلىس سپيكەرلەرىنىڭ ۇشۋ شىعىندارى ءۇشىن رەسپۋبليكالىق بيۋدجەتتەن جىلىنا 15-20 ملرد تەڭگە قاراجات جۇمسالادى دەپ مالىمدەگەن بولاتىن. پرەمەر-مينيستردىڭ باسپا ءسوز قىزمەتى بۇل دەرەكتەر شىندىققان جاساسپايتىنىن حابارلادى.
"ءىس جۇزىندە 2021 جىلعا پرەمەر-مينيسترى مەن پرەمەر-مينيستردىڭ ورىنباسارلارى باستاعان قازاقستاندىق دەلەگاسيالاردىڭ اسا ماڭىزدى ۇشۋ ساپارلارىن (ليتەرلىك رەيستەردى) جۇزەگە اسىرۋعا 578 ملن تەڭگە مولشەرىندە شىعىس قاراجاتى قاراستىرىلعان. كورسەتىلگەن سوما 2021 جىلى كولىك قىزمەتتەرىن قامتاماسىز ەتۋگە ەسەپتەلگەن. بۇل رەتتە تولەم قازاقستاندىق دەلەگاسيالاردىڭ ورىندالعان ناقتى وڭىرلىك جانە حالىقارالىق ۇشۋ جاعدايلارى بويىنشا تولەنەدى. مىسالى، 2020 جىلى وسى ماقساتقا 578 ملن تەڭگە قاراستىرىلسا، ءىس جۇزىندە 275،6 ملن تەڭگەگە جۇمسالدى" دەلىنگەن حابارلامادا.
باسپا ءسوز قىزمەتىنىڭ مالىمەتىنشە، پرەمەر-مينيستر مەن پرەمەر-مينيستردىڭ ورىنباسارلارىندا تەك ولارعا بەكىتىلگەن جەكە ۇشاقتار جوق.
سونداي-اق باسپا ءسوز قىزمەتى ۇشاقتا قىزمەت كورسەتۋگە قىزىل جانە قارا ۋىلدىرىق، اراق پەن ۆيسكي، ەكزوتيكالىق جەمىستەر كىرەتىنىن تۋرالى اقپاراتتى دا تەرىستەدى.
"ۇشۋ ۇزاقتىعى 1 ساعاتقا دەيىن بولعان جاعدايدا جولاۋشىلارعا الكوگولسىز سالقىن سۋسىندار مەن سنەكتەر، ۇزاقتىعى 1-3 ساعات بولعان كەزدە ىستىق تاماق پەن ىستىق سۋسىندار (شاي، كوفە) بەرىلەدى. بورتتا تاماقتاندىرۋ ارەكەت ەتىپ تۇرعان زاڭناماعا – "قازاقستان رەسپۋبليكاسىنىڭ اۋە كەڭىستىگىن پايدالانۋ جانە اۆياسيا قىزمەتى تۋرالى" ق ر زاڭىنا، جولاۋشىلاردى، باگاجدى جانە جۇكتەردى اۋە كولىگىمەن تاسىمالداۋ قاعيدالارىنا جانە باسقا دا نورماتيۆتىك قۇقىقتىق اكتىلەرگە سايكەس ۇسىنىلادى" دەگەن باسپا ءسوز قىزمەتى جۋرناليست جازباسى "فاكتىلەردى بۇرمالاۋدىڭ جانە قوعامدىق رەزونانس تۋدىرۋ ءۇشىن جالعان اقپارات تاراتۋدىڭ تاعى ءبىر جاعدايى" دەپ مالىمدەدى.
بۇعان دەيىن مەملەكەتتىك ارنادا ىستەگەن جۋرناليست پرەمەر-مينيسترگە جانە ونىڭ ءتورت ورىنباسارىنا جەكە-جەكە ۇشاق قاراستىرىلعانى، ونىڭ شىعىنى تۋرالى ەش جەردە ايتىلمايتىنىن جازعان.
پىكىر قالدىرۋ