پرەزيدەنت قاسىم-جومارت توقايەۆ الماتى قالاسىنىڭ دەنساۋلىق ساقتاۋ سالاسىنداعى كۇردەلى احۋال تۋرالى مالىمدەدى.
ونىڭ ايتۋىنشا، بۇل سالاداعى كوپتەگەن كوكەيتەستى ماسەلەلەر كوروناۆيرۋسپەن كۇرەستىڭ كولەڭكەسىندە قالىپ قويىپ جاتىر.
– جالپى ازاماتتاردىڭ مەديسينالىق قىزمەت كورسەتۋ ساپاسىنا كوڭىلى تولمايتىنىن ايتۋىمىز كەرەك. مەديسينا كادرلارىنىڭ جەتىسپەۋشىلىگى دە كوپتىڭ كوكەيىندەگى كۇرمەۋلى ماسەلە. بۇل پروبلەما جىلدار بويىنا شەشىلمەي كەلە جاتىر. اسىرەسە، كەشەگى توتەنشە جاعداي رەجيمى كەزىندە بۇل ماسەلەنىڭ وزەكتىلىگى ارتا ءتۇستى. قالاعا 300-گە جۋىق دارىگەر قاجەت. بۇل وتە كوپ. ەگەر الماتىدا جاعداي وسىنداي بولسا، وندا شەت جاتقان ايماقتار تۋرالى نە ايتۋعا بولادى؟! اتالعان جاعدايدى قالانىڭ دەنساۋلىق ساقتاۋ باسقارماسىنداعى كادرلاردىڭ توقتاۋسىز اۋىسۋى ۋشىقتىرىپ جىبەرىپ وتىر. وندا جەمقورلىققا قاتىستى زاڭ بۇزۋشىلىقتار ورىن الدى. قالاي ايتساق تا، دەنساۋلىق ساقتاۋ باسقارماسىندا تۇراقتىلىق بولعان جوق. اكىمدىك بۇل ماسەلەلەردى شەشۋمەن ناقتى اينالىسۋ كەرەك، – دەدى پرەزيدەنت الماتى قالاسىن ودان ءارى دامىتۋ ماسەلەلەرى جونىندەگى كەڭەستە.
توقايەۆ ەلدەگى ەپيدەميالىق احۋالدىڭ تۇراقسىز ەكەنىن ايتا كەلە، قالا تۇرعىندارى مەن بيزنەس وكىلدەرى ىندەتتەن ساقتانۋعا اسا ءمان بەرمەي، ونى ەلەمەي جۇرگەنىن دە اتاپ ءوتتى.
– مەن تاعى دا وتانداستارىمىزدى سابىر ساقتاۋعا، بارلىق سانيتارلىق نورمالاردى قاتاڭ ۇستانۋعا، كوروناۆيرۋسقا قارسى جاپپاي ۆاكسيناسيانى قولداۋعا شاقىرامىن. ۇكىمەت پەن اكىمدىكتەر جاپپاي ۆاكسيناسيا جۇرگىزۋگە دايىن بولۋى كەرەك. ءبىز 1 اقپاننان ۆاكسيناسيا جۇمىسىن باستادىق. ءبىراق ءدال قازىرگى ۋاقىتقا دەيىن ۆاكسينا سالدىرعان ازاماتتاردىڭ سانى 19 مىڭنان ءسال عانا اسادى. جوسپار بويىنشا ءبىز 6 ميلليوننان استام ادامعا ۆاكسينا سالدىرۋىمىز كەرەك. ەگەر ءوز ءوندىرىسىمىزدىڭ قۋاتى مەن رەسەيدەن اكەلىنەتىن ۆاكسينا جەتپەي جاتسا، وندا نارىققا شىعىپ، قاجەتتى كولەمدى يمپورتتاۋ قاجەت. جاپپاي يممۋنيتەت قالىپتاستىرماي اۋرۋدى جەڭە المايمىز، ەكونوميكانى قايتا قالپىنا كەلتىرۋ دە مۇمكىن ەمەس. ۇكىمەتكە اتالعان جۇمىستى جانداندىرۋدى تاپسىرامىن. بۇل ماسەلەنى ءوزىم باقىلاپ وتىرامىن. ۆاكسيناسياعا دۇرىس قاراۋ كەرەك، بۇدان باسقا جول جوق. وسى ماسەلەنى ازاماتتاردىڭ ەسىنە تاعى ءبىر مارتە سالعىم كەلەدى، – دەدى مەملەكەت باسشىسى.
پىكىر قالدىرۋ