پرەزيدەنت قاسىم-جومارت توقايەۆ الماتى قالاسىن ودان ءارى دامىتۋ ماسەلەلەرى جونىندە كەڭەس وتكىزدى.
پرەزيدەنت 2020 جىلدىڭ قورىتىندىسى بويىنشا الماتىنىڭ الەۋمەتتىك-ەكونوميكالىق دامۋىندا وڭ قارقىن بارىن، ءبىراق احۋال قۇبىلمالى سيپاتقا يە ەكەنىن، "بوساڭسۋعا بولمايتىنىن" ايتتى.
سونىمەن قاتار مەملەكەت باسشىسى قالانى ودان ءارى دامىتۋ ءۇشىن ءوسىمنىڭ جاڭا باستاۋلارى قاجەت ەكەنىن اتاپ ءوتتى. مۇنداي باعىتتاردىڭ ءبىرى جاڭاشا تۇرلەنگەن ەكونوميكا.
– بۇل ماسەلەدە يننوۆاتورلار، جاستار مەن بيزنەس اراسىنداعى ءتيىمدى قارىم-قاتىناس ماڭىزدى ءرول اتقارادى. مۇنى دامىعان ەلدەردىڭ تاجىريبەسىنەن كورۋگە بولادى. بۇل جەردە "ۆەلوسيپەد ويلاپ تابۋدىڭ" قاجەتى جوق. كراۋدفاندينگ، ءبىلىم بەرۋ حابتارى، بيزنەس-كومەكشىلەرمەن اراداعى ارنايى ينۆەستيسيالىق كەزەڭدەر سياقتى تەحنولوگيالار شەتەلدە وزدەرىن جاقسى قىرىنان كورسەتتى. جالپى اكىمدىكتەردە جاڭاشا تۇرلەنگەن ەكونوميكانى دامىتۋ جونىندە تۇسىنىك پەن وزىندىك كوزقاراس بار.
الماتى قالاسىنىڭ تاجىريبەسىن وزگە وڭىرلەردە قولدانۋ قاجەت. ءبىزدىڭ جەرىمىز تالانتتارعا باي. جاس ورىنداۋشىلار، شىعارماشىلىق وكىلدەرى ايماقتىق قانا ەمەس، الەمدىك دەڭگەيدە دە مويىندالىپ جاتىر، – دەدى قاسىم-جومارت توقايەۆ.
جيىندا پرەزيدەنت ەل تاۋەلسىزدىگىنىڭ 30 جىل ىشىندەگى تابىستارى الماتى قالاسىمەن تىعىز بايلانىستى ەكەنىن اتاپ ءوتتى.
– تاۋەلسىزدىگىمىز الماتىدا جاريالاندى. سوندىقتان بۇل شاhاردىڭ تاريحي ءرولى ايرىقشا. ءقازىر الماتى – ەكونوميكامىزدىڭ باستى قوزعاۋشى كۇشى. سونىمەن بىرگە مۇندا بيزنەس سالاسى جاقسى دامىعان، – دەدى پرەزيدەنت.
پىكىر قالدىرۋ