اقش پەن قىتايدىڭ الياسكادا وتكەن جوعارى دەڭگەيدەگى كەلىسسوزدەرى بىر-بىرىنە وتكىر سىن ايتۋمەن ءوتتى.
جۇڭگو شەنەۋنىكتەرى اقش-تى "قىتايعا شابۋىل جاساۋعا" ۇگىتتەدى دەپ ايىپتادى، ال اقش "جۇڭگو السىزدەردى باسىندى" دەپ مالىمدەدى.
ەكى الپاۋىت ەلدىڭ قارىم-قاتىناسى بىرنەشە جىلدان بەرى شيەلەنىسى جاعدايدا ءوربىپ كەلەدى.
اقش شىڭجاڭداعى قازاق، ۇيعىر سياقتى مۇسىلمان ازشىلىقتارعا بەيجىڭ تاراپىنان جاسالعان قىسىم ماسەلەسىن كوتەرۋدى جالعاستىراتىنىن مالىمدەدى.
الياسكاداعى اشۋلى جانە ءبىر-بىرىن ايىپتاۋعا تولى جاعدايدا وتكەن كەلىسسوزدەرگە اقش تارابىنان مەملەكەتتىك حاتشىسى انتونيي بلينكەن مەن ۇلتتىق قاۋىپسىزدىك جونىندەگى كەڭەسشى دجەيك سالليۆان قاتىسسا، قىتايدان جوعارى سىرتقى ساياسات قايراتكەرى يان سزەچيمەن جانە سىرتقى ىستەر ءمينيسترى ۆان ي كەلدى.
بلينكەن تىكەلەي اشىلۋ مالىمدەمەسىندە اقش-تىڭ ۇلكەن الاڭداۋشىلىعى رەتىندە قىتايدىڭ كەيبىر ءىس-قيمىلدارىن، ونىڭ ىشىندە شىڭجاڭ، گونكونگ، تايۆان ماسەلەسىن ايتتى. وعان قوسا، اقش-قا كيبەر شابۋىلدار جانە بەيجىڭنىڭ ەكونوميكالىق ماجبۇرلەۋى ەكى ەل اراسىنداعى تۇيىتكىل ەكەنىن ايتتى.
"بۇل ارەكەتتەردىڭ ءارقايسىسى جاھاندىق تۇراقتىلىقتى ساقتايتىن ەرەجەلەرگە نەگىزدەلگەن تارتىپكە ءقاۋىپ توندىرەدى" دەدى ول.
بۇعان جاۋاپ رەتىندە يان ۆاشينگتوندى ءوزىنىڭ اسكەري كۇشى مەن قارجىلىق ۇستەمدىگىن باسقا ەلدەردى باسىپ-جانشۋ ءۇشىن پايدالاندى دەپ ايىپتادى.
"بۇل تاۋار اينالىمىنا كەدەرگى كەلتىرىپ، كەيبىر ەلدەردى قىتايعا شابۋىل جاساۋعا يتەرمەلەيدى" دەپ قوستى ول.
پىكىر قالدىرۋ