قازاقستاندا 1 اقپاننان باستاپ كوروناۆيرۋسقا قارسى جاپپاي ۆاكسيناسيالاۋدىڭ ءبىرىنشى كەزەڭى باستالدى. ونىڭ اياسىندا دەنساۋلىق ساقتاۋ ۆيسە-مينيسترلەرى، اكىمدەر، مەديسينا قىزمەتكەرلەرى، پەداگوگتەر ەكپە سالدىردى. "قامشى" ءتىلشىسى ءقاۋىپتى ىندەتكە قارسى ۆاكسينا سالدىرعان ادامدارمەن تىلدەسىپ، جاعدايلارىن ءبىلدى.
ۆاكسينانىڭ العاشقى دوزاسىن سالدىرعانداردىڭ ءبىرى – قارلىعاش تورەبەك قىزى. ماماندىعى – وقىتۋشى. قازىرگى ۋاقىتتا قىزىلورداداعى م.مامەتوۆا اتىنداعى پەداگوگيكالىق كوللەدجدە جۇمىس ىستەيدى. ايتۋىنشا، ەكپە سالدىرعاننان كەيىن ەشقانداي اۋىرسىنۋ بەلگىلەرىن بايقاماعان.
– ءقازىر عالامدا بەلەڭ الىپ جاتقان كوروناۆيرۋس ينفەكسياسى حالىقتى قاتتى الاڭداتىپ وتىر. وسىعان وراي ەلىمىزدە ۆيرۋسقا قارسى ۆاكسيناسيا ءجۇرىپ جاتىر. ءوزىم 5 ناۋرىزدا "سپۋتنيك-V" ۆاكسيناسىنىڭ العاشقى دوزاسىن سالدىردىم. ۆاكسيناسيا ەرىكتى تۇردە جۇرگىزىلدى. ۆاكسيناسيا ەكى كەزەڭنەن تۇرادى. ەكىنشى دوزا جوسپارعا ساي 26 ناۋرىزدا سالىنۋعا ءتيىس. العاشقى دوزادان كەيىن ەشقانداي اۋىرسىنۋ بەلگىلەرى بولمادى. تەك دارىگەرلەر 3 كۇنگە دەيىن جىلى كيىنىپ، سۋعا تۇسپەۋدى ەسكەرتتى. كەيبىر ادامدا تەمپەراتۋرانىڭ كوتەرىلۋى سىندى بەلگىلەر سەزىلگەن. ءبىراق وزىمدە ونداي بايقالمادى. مۇمكىن يممۋنيتەتىم جاقسى بولعاننان شىعار، – دەدى اڭساعان نۇرماحانوۆا.
ال جەتىساي قالاسىنداعى مەكتەپ ينتەرناتتاردىڭ بىرىندە ەدەن جۋۋشى بولىپ جۇمىس ىستەيتىن فاريزا ءمۇتالحان قىزى ۆاكسينا سالدىرعاننان كەيىن بىرنەشە كۇن ءوزىن جايسىز سەزىنگەن.
– باستاپقىدا بويىمدى قورقىنىش سەزىمى بيلەدى. ومىرىمە ءقاۋىپتى ەمەس پە دەگەن ويلار دا كەلدى. تاۋەكەلگە بەل بۋىپ، بار ءۇمىتىمىزدى تەك اللاعا تاپسىردىق. اجال كەلسە، ۆاكسيناسىز دا ومىردەن ءوتىپ كەتەمىز عوي. ەكپە سالدىرۋ ەرىكتى تۇردە بولعاندىقتان، ءبىراز ويلانىپ، 11 ناۋرىزدا ۇجىممەن ءبىر ءۇيدىڭ بالالارىنداي ۆيرۋسقا قارسى "سپۋ́تنيك-V" ۆاكسيناسىن سالدىردىق.
ەكپەدەن كەيىن مەيىربيكەلەر ءبىزدى 30 مينۋت باقىلاپ، تەمپەراتۋرامىزدى تەكسەرىپ وتىردى. العاشقى كۇندەرى اۋىرسىنۋ بەلگىلەرى بايقالىپ، 3-4 كۇندەي مازام بولمادى. ءقازىر اللاعا شۇكىر جاعدايىم وتە جاقسى. ەندى ۆاكسينانىڭ ەكىنشى دوزاسىن سالدىرامىن دەپ وتىرمىن. ودان كەيىن ونىڭ اسەرىن كورەمىز. باستىسى ەكپەدەن كەيىن وزىمىزگە كۇتىم جاساپ، سالقىن سۋ ىشپەي، جىلى كيىنىپ جۇرۋگە كەڭەس بەردى. دەنساۋلىق ادام بالاسىنىڭ ەڭ باستى بايلىعى عوي. سوندىقتان دارىگەرلەردىڭ ايتقاندارىنا قۇلاق اسقانىمىز ابزال، – دەيدى ول.
الماتىداعى №143 ورتا مەكتەپتىڭ قازاق ءتىلى مەن قازاق ادەبيەتى ءپانىنىڭ ءمۇعالىمى عاليا ساۋرىقوۆادا ۆاكسينادان ەشقانداي رەاكسيا بولماعان.
– 15 ناۋرىزدا الماتى قالاسىنداعى №2 ەمحانادا كوروناۆيرۋسقا قارسى "سپۋتنيك-V" ۆاكسيناسىن ەكتىردىم. دەنساۋلىعىما الاڭداعاندىقتان، ۆاكسينانى العاشقىلاردىڭ ءبىرى بولىپ سالدىرۋدى ءجون كوردىم. ەكپەدەن كەيىن دەنساۋلىعىما كەرى اسەرى بولمادى. جۋىردا جولداسىم دا سالدىردى، ۆاكسينادان ەشقانداي رەاكسيا بولعان جوق. بۇل – ءبىزدىڭ وتباسىلىق شەشىمىمىز. ەندى 21 كۇننەن كەيىن ەكىنشى دوزانى سالعىزامىز، – دەيدى ع. ساۋرىقوۆا.
P.S. دەنساۋلىق ساقتاۋ مينيسترلىگى 19 ناۋرىزداعى جاعداي بويىنشا قازاقستاندا 100 مىڭنان استام ادامعا كوروناۆيرۋسقا قارسى ۆاكسينا سالىنعانىن مالىمدەگەن. ونىڭ ىشىندە 63 مىڭنان استام مەديسينا قىزمەتكەرى، 22 مىڭ پەداگوگ، كۇش قۇرىلىمدارىنىڭ 7 مىڭ قىزمەتكەرى، باسقا ساناتتاعى 8 مىڭ ادام بار.
ەگىلگەن ادامداردىڭ 1%-ىندا دەنە تەمپەراتۋراسى كوتەرىلىپ، تۇماۋعا ۇقساس جاي-كۇيلەر، السىزدىك، سونداي-اق ۆاكسينا ەنگىزىلگەن جەردىڭ ءىسىنۋى جانە قىزارۋى تۇرىندەگى جەرگىلىكتى كورىنىستەر تىركەلگەن.
ادامداردى يممۋنداۋ ماقساتىندا ءساۋىر ايىندا 1 ملن-نان استام ازامات ۆاكسيناسيالانباق.
انىقتاما
قازاقستاندا كوروناۆيرۋسقا قارسى ۆاكسينا ەكتىرۋ ەرىكتى تۇردە جۇرگىزىلەدى. "حالىق دەنساۋلىعى جانە دەنساۋلىق ساقتۋ جۇيەسى تۋرالى" كودەكستىڭ 77-بابىنا سايكەس، كەز كەلگەن مەديسينالىق ءراسىم ونىڭ ىشىندە، ۆاكسينالاۋ ازاماتتىڭ كەلىسىمى ارقىلى عانا ورىندالادى.
قازاقستاندا ازاماتتار ۆاكسينالاۋدان باس تارتقانى ءۇشىن اكىمشىلىك نەمەسە قىلمىستىق جاۋاپكەرشىلىككە تارتىلمايدى.
پىكىر قالدىرۋ