قازاقستان ۇلتتىق بانكى قۇرامداس بولىگىندە التىن كومپونەنتى بار كۇمىستەن جاسالعان نومينالى 1000 تەڭگەلىك «QAZAQSTANNYŃ ASTANASY – NUR-SULTAN» كوللەكسيالىق مونەتالارىن شىعارادى، دەپ حابارلادى nationalbank.kz سايتى.  

مونەتالاردىڭ ساتىلىمعا شىعاتىن كۇنى الداعى ۋاقىتتا حابارلانباق.

1 000 تەڭگەلىك نومينال 1000 دانا تارالىممەن دايىندالعان. جالپى ماسساسى 62،2 گرامم.  925/1000 سىنامالى كۇمىستەن، ماسساسى 46،2 گرامم، قۇرامداس بولىگى 999/1000 سىنامالى التىننان، "proof" دايىنداۋ ساپاسىمەن ازىرلەنگەن. ديامەترى 50 مم، ماسساسى 16 گرامم.

مونەتالار تولەمنىڭ بارلىق ءتۇرى بويىنشا قازاقستاننىڭ بۇكىل اۋماعىندا قابىلدانۋعا، سونداي-اق ەلىمىزدىڭ بارلىق بانكىندە، بانك شوتتارىنا ەسەپكە الىنۋعا، اۋدارىلۋعا، ۇساقتالۋعا جانە ايىرباستاپ الۋعا مىندەتتى.

مونەتالار كادەسىي ورامىندا شىعارىلادى جانە مەملەكەتتىك تىلدە، ورىس، اعىلشىن تىلدەرىندە قازاقستان ۇلتتىق بانكىنىڭ نومىرلىك ساپا سەرتيفيكاتىمەن جابدىقتالعان.