بيىل ءبىلىم جانە عىلىم مينيسترلىگى قازۇۋ-گە تيەسىلى جەر تەلىمىنىڭ ساتىلۋىنا بايلانىستى پىكىر ءبىلدىردى. بۇل تۋرالى مينيستر اسحات ايماعامبەتوۆتىڭ "اق جول" فراكسياسى دەپۋتاتتارىنىڭ ساۋالىنا بەرگەن جاۋابىندا  ايتىلعان.

– ءال-فارابي اتىنداعى قازاق ۇلتتىق ۋنيۆەرسيتەتىنىڭ جەر تەلىمىن تۇزەتۋگە قاتىستى پوست جاريالاعاننان كەيىن، تەز ارادا مينيسترلىكتىڭ جۇمىس توبى سىبايلاس جەمقورلىققا قارسى ءىس-قيمىل اگەنتتىگىمەن بىرلەسىپ، باياندالعان بارلىق فاكتىلەردى تەكسەرۋدى باستادى. جۇرگىزىلگەن تەكسەرۋ قورىتىندىسى بويىنشا قازۇۋ جەر ۋچاسكەسىنىڭ 0،779 گەكتارعا ازايۋ فاكتىسى راستالدى. وسىعان بايلانىستى، جەر ۋچاسكەلەرىن باسقارۋ بولىگىندە قازۇۋ قىزمەتىن تولىققاندى زەرتتەۋ ماقساتىندا مينيسترلىك كەشەندى تەكسەرۋ جۇرگىزۋدى كوزدەدى. الايدا اعىمداعى جىلعى ناۋرىزدا رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتى قازۇۋ-عا اۋديت باستاۋىنا بايلانىستى قولدانىستاعى زاڭناماعا سايكەس تەكسەرىس جۇرگىزۋ مۇمكىن ەمەس، – دەدى ايماعامبەتوۆ.

مينيستر سونداي-اق بيىل 8 جوعارى وقۋ ورنىنا تيەسىلى اكتيۆتەر تەكسەرىلەتىنىن ايتتى.

"2020 جىلعى جەلتوقساننان باستاپ، جوعارى وقۋ ورىندارىنىڭ كوممەرسيالىق ەمەس اكسيونەرلىك قوعامدارعا قايتا ۇيىمداستىرىلۋىنىڭ اياسىندا مينيسترلىك ۆەدومستۆولىق باعىنىستى جوعارى وقۋ ورىندارىمەن بىرلەسىپ، ولاردىڭ ەسەبىن رەتكە كەلتىرۋ، جەر كودەكسىنىڭ تالاپتارىنا سايكەس كەلتىرۋ، جوعارى وقۋ ورىندارىنىڭ جىلجىمايتىن مۇلىك وبەكتىلەرى تۋرالى مالىمەتتەردى مەملەكەتتىك ورگانداردىڭ دەرەكتەرىمەن بىرىزدەندىرۋ ماقساتىندا جەر ۋچاسكەلەرىن قوسا العاندا، بارلىق جىلجىمايتىن مۇلىك وبەكتىلەرىن تۇگەندەۋ بويىنشا جۇمىس جۇرگىزىپ جاتىر.

سونىمەن قاتار بيىل مينيسترلىك 8 جوعارى وقۋ ورنىنىڭ قىزمەتىن تەكسەرۋدى جوسپارلاپ وتىر. ونىڭ بارىسىندا ولاردىڭ اكتيۆتەرىنىڭ جاي-كۇيى تەكسەرىلەتىن بولادى" دەدى ول.

ايماعامبەتوۆتىڭ ايتۋىنشا، مينيسترلىك مەملەكەتتىك مۇلىك جونىندەگى ۋاكىلەتتى ورگاندا كەلىسۋدەگى جىلجىمايتىن مۇلىكتى، ونىڭ ىشىندە جەر ۋچاسكەلەرىن يەلىكتەن شىعارۋ ماسەلەلەرىن ديرەكتورلار كەڭەسىنىڭ قۇزىرەتىنە جاتقىزۋ بولىگىندە جوعارى وقۋ ورىندارى جارعىلارىنا وزگەرىستەر ەنگىزۋ ماسەلەسىن پىسىقتادى. بۇل باقىلاۋدى كۇشەيتۋگە جانە جوعارى وقۋ ورىندارىنىڭ اكتيۆتەرىن قانداي دا ءبىر يەلىكتەن شىعارۋدىڭ الدىن الۋعا مۇمكىندىك بەرەدى.

"جوعارى وقۋ ورىندارىنىڭ ديرەكتورلار كەڭەستەرى كورپوراتيۆتىك شەشىمدەر قابىلداۋ كەزىندە اشىقتىقتى قامتاماسىز ەتۋ ءۇشىن قۇرىلعانىن اتاپ وتكەن ءجون. ديرەكتورلار كەڭەسىنىڭ قۇرامىنا پارلامەنت دەپۋتاتتارى، ءبىلىم بەرۋ سالاسىنىڭ كورنەكتى قايراتكەرلەرى جانە تاۋەلسىز ساراپشىلار ەنگىزىلگەن. وسى ماقساتتا كونكۋرستىق راسىمدەر وتكىزۋ ارقىلى جوعارى وقۋ ورىندارىنىڭ رەكتورلارىن تاعايىنداۋدىڭ اشىق جۇيەسى ەنگىزىلدى. جالپى جوعارى وقۋ ورىندارى قىزمەتىنىڭ تيىمدىلىگى مەن اشىقتىعىن ارتتىرۋ ماسەلەلەرى مينيسترلىكتىڭ تۇراقتى باقىلاۋىندا" دەلىنگەن ءمينيستردىڭ دەپۋتاتتارعا بەرگەن جاۋابىندا.