ەرجان جىلقىبايەۆ تاراز قالاسىنىڭ اكىمى بولىپ تاعايىندالدى، دەپ حابارلادى جامبىل وبلىسى اكىمىنىڭ باسپا ءسوز قىزمەتى.

"جامبىل وبلىسى اكىمىنىڭ وكىمىمەن پرەزيدەنت اكىمشىلىگىنىڭ جانە قالالىق ءماسليحات دەپۋتاتتارىنىڭ كەلىسىمىمەن ەرجان جىلقىبايەۆ تاراز قالاسىنىڭ اكىمى بولىپ تاعايىندالدى" دەلىنگەن حابارلامادا.

وبلىس ورتالىعىنىڭ جاڭا اكىمىن قالا اكتيۆىنە ايماق باسشىسى بەردىبەك ساپاربايەۆ تانىستىردى.

– ايتقازى قارابالايەۆتىڭ اتقارعان جۇمىسىنا راحمەت ايتامىن. تاراز وبلىس ورتالىعى بولعاننان كەيىن ونىڭ دامۋى ايماقتىڭ دامۋىنا تىكەلەي بايلانىستى.

ەرجان جىلقىبايەۆ ءبىراز جەردە قىزمەت اتقاردى، سىننان ءوتتى. تارازدىڭ دامۋىنا بار تاجىريبەسىن سالادى دەپ سەنەمىن. ەڭ باستىسى، بىرىگىپ جۇمىس ىستەۋ كەرەك. تاراز مادەني، تۋريزم ورداسى بولۋى كەرەك. بىلتىرعى جىل قوردايعا كوپ كوڭىل بولىنسە، بيىل تارازعا ەرەكشە نازار اۋدارىلماق. حالىقتىڭ جاعدايىن جاقسارتۋ، الەۋمەتتىك نىساندار سالۋ، ينفراقۇرىلىمدى،  كەلبەتىن جاقسارتۋعا كوڭىل بولىنەدى، – دەپ اتاپ ءوتتى بەردىبەك ساپاربايەۆ.

ايتقازى قارابالايەۆ تاراز جۇرتىنا العىس ءبىلدىردى. ال جاڭادان تاعايىندالعان اكىم ەرجان جىلقىبايەۆ ارتىلعان سەنىمدى اقتايمىن دەپ سەندىردى.

ەرجان جىلقىبايەۆ 1982 جىلى تۋعان، ءبىلىمى جوعارى.

م. اۋەزوۆ اتىنداعى وڭتۇستىك قازاقستان مەملەكەتتىك ۋنيۆەرسيتەتىن "ەكونوميست-مەنەدجەر"، ق ر پرەزيدەنتى جانىنداعى مەملەكەتتىك باسقارۋ اكادەمياسىن "مەملەكەتتىك جانە جەرگىلىكتى باسقارۋ ماگيسترى"، س. امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىن "زاڭگەر" ماماندىعى بويىنشا بىتىرگەن.

ەڭبەك جولىن 2003 جىلى وڭتۇستىك قازاقستان وبلىستىق ەكونوميكا دەپارتامەنتىنىڭ باس مامانى قىزمەتىنەن باستادى.

2006-2009 جىلدارى پارلامەنتتەگى ۇكىمەت وكىلدىگىنىڭ باس ساراپشىسى، ەكونوميكا جانە بيۋدجەتتىك جوسپارلاۋ مينيسترلىگىنىڭ ءبولىم باسشىسى، ەڭبەك جانە حالىقتى الەۋمەتتىك قورعاۋ ءمينيسترىنىڭ كومەكشىسى قىزمەتتەرىن اتقاردى.

2009-2014 جىلدارى – شقو اكىمىنىڭ اپپاراتى باسشىسىنىڭ ورىنباسارى، سەمەي قالاسى اكىمىنىڭ ورىنباسارى، شىعىس قازاقستان وبلىسى اكىمى اپپاراتىنىڭ باسشىسى.

ءار جىلدارى پرەزيدەنت اكىمشىلىگىنىڭ مەملەكەتتىك باقىلاۋ جانە ۇيىمداستىرۋ-اۋماقتىق جۇمىستارى ءبولىمىنىڭ مەملەكەتتىك ينسپەكتورى، الماتى قالاسى مەدەۋ اۋدانىنىڭ اكىمى قىزمەتىندە بولعان، ەڭبەك جانە حالىقتى الەۋمەتتىك قورعاۋ ءمينيسترىنىڭ ءبىرىنشى ورىنباسارى قىزمەتىن اتقاردى.

2020 جىلدىڭ اقپانىنان باستاپ جامبىل وبلىسى اكىمىنىڭ ورىنباسارى بولعان. "قۇرمەت" وردەنىمەن، ءتۇرلى مەملەكەتتىك جانە حالىقارالىق ناگرادالارمەن ماراپاتتالعان. ۇيلەنگەن، 4 بالاسى بار.