قازاقستاننىڭ تۇڭعىش پرەزيدەنتى نۇرسۇلتان نازاربايەۆ قازاقستاندىقتاردى ناۋرىز مەيرامىمەن قۇتتىقتادى. بۇل تۋرالى elbasy.kz سايتى حابارلادى.
"سىزدەردى ۇلىستىڭ ۇلى كۇنى – ناۋرىز مەيرامىمەن قۇتتىقتايمىن!
كوكتەمگى كۇن مەن ءتۇننىڭ تەڭەلۋى – بۇكىل قازاقستاندىقتار اسىعا كۇتەتىن جانە ەرەكشە اتاپ وتەتىن ايتۋلى مەرەكە. حالقىمىزدىڭ ۇلى مادەنيەتى، باي ءسالت-داستۇرى كورىنىس تاپقان ناۋرىز مەيرامى قازاقستاندا تۇراتىن بارلىق ەتنوس وكىلدەرىن ۇيىستىرادى.
تاۋەلسىزدىك جىلدارى بۇل مەرەكە ەل بىرلىگىنىڭ جارقىن سيمۆولىنا اينالدى. ول تاتۋلىق، تۇراقتىلىق جانە ۇلتارالىق كەلىسىم مەملەكەتىمىزدىڭ ۇيلەسىمدى دامۋىنىڭ ىرگەتاسى ءارى زور جەڭىستەرىنىڭ كەپىلى ەكەنىن ايعاقتايدى. ءبىز تاۋەلسىزدىكتىڭ وسى نەگىزگى قۇندىلىقتارىن كوزدىڭ قاراشىعىنداي ساقتاپ، ءارى قاراي نىعايتۋعا ءتيىسپىز. قازاقستاندىقتار بۇل مىندەتتى ابىرويمەن اتقارىپ كەلە جاتىر. الداعى ۋاقىتتا دا سولاي بولارىنا كامىل سەنەمىن.
وسى شۋاقتى مەرەكەدە وتانىمىز – قازاقستان رەسپۋبليكاسىنا شىن جۇرەكتەن تىنىشتىق پەن باق-بەرەكە تىلەيمىن. ءاردايىم شاڭىراقتارىڭىزدان ىرىس پەن ىنتىماق، يگىلىك پەن مولشىلىق كەتپەسىن! ۇلىس وڭ بولسىن، اق مول بولسىن!" دەلىنگەن حابارلامادا.
پىكىر قالدىرۋ