جەكە ءتۇرعىنۇي سالۋ ماقساتىنداعى جەرلەر ماسەلەسىن مەملەكەتتىك-جەكەمەنشىك سەرىكتەستىك ارقىلى شەشۋ كەرەك. بۇل تۋرالى جەر رەفورماسى جونىندەگى كوميسسيا وتىرىسى كەزىندە كوميسسيا مۇشەسى، زاڭگەر باقىتجان بازاربەك ايتتى.
زاڭگەردىڭ ايتۋىنشا، ءتۇرعىنۇي سالۋ ماقساتىنداعى جەر ۋچاسكەلەرىنىڭ كەزەگىندە 1 جارىم ملن ادام تۇر. ماسەلە شەشىلمەسە، مۇنىڭ ارتى الەۋمەتتىك اۋىتقۋعا اكەلىپ سوعۋى مۇمكىن.
كوميسسيا مۇشەسى جەر كودەكسىنىڭ 44-بابىنا سايكەس مۇنداي ۋچاسكەلەر ينجەنەرلىك قۇرىلىمى جۇرگىزىلگەن القاپتاردان بەرىلۋى كەرەكتىگى ايتىلعانىن، مۇنداي ينجەنەرلىك قۇرىلىمدى جۇرگىزۋ ءۇشىن ۇكىمەتتە قارجى جوق ەكەنىنە نازار اۋداردى.
– ينجەنەرلىك قۇرىلىممەن قامتىلعان القاپتار كەمىندە ەلەكتر جانە سۋ جەلىسىمەن قامتىلۋى كەرەك. ءبىراق مۇنداي اقشا مەملەكەتتە جوق. سوندىقتان جەر كودەكسىنىڭ جاڭا رەداكسياسىندا مەملەكەتتىك-جەكەمەنشىك سەرىكتەستىك نەگىزىندە جەكە بيزنەستى ينجەنەرلىك جەلىلەردى تارتۋعا جۇمىلدىرۋ جاعىن ويلاستىرۋ كەرەك. سول ارقىلى جەر بەرۋدى جىلدامداتىپ، كەزەكتى جىلجىتا الامىز. سوندا ازاماتتار جەر رەفورماسى ءجۇرىپ جاتقانىن سەزەدى، – دەدى ول.
كوميسسيا ءتوراعاسى، پرەمەر-مينيستردىڭ ورىنباسارى ەرالى توعجانوۆ باستاما وتە ورىندى ەكەنىن ايتىپ، ۇسىنىس قاراستىرىلاتىنىن جەتكىزدى.
جەر كودەكسى بويىنشا قازاقستان ازاماتتارى جەكە ءتۇرعىنۇي قۇرىلىسىنا ارنالعان 10 سوتىق جەر ۋچاسكەسىن تەگىن الۋعا قۇقىلى. جەر ۋچاسكەسى وزگە جىلجىمايتىن مۇلىكتىڭ بارىنا قاراماستان بەرىلەدى. ءبىراق ازاماتتار جەر ۋچاسكەسىنىڭ كەزەگى مۇلدە جىلجىمايتىن ءجيى ايتادى.
پىكىر قالدىرۋ