نەمولچيKZ قوعامدىق قورى الماتىدا 19 جاستاعى اياجان ەدىلوۆانى اياۋسىز ءولتىردى دەلىنگەن كۇدىكتىنى ءومىر بويىنا باس بوستاندىعىنان ايىرۋدى سۇرايدى. 

نەمولچيKZ قورىنا ولتىرىلگەن قىزدىڭ جاقىندارى حابارلاسىپ، ءىستىڭ ءمان-جايىن اشىپ ايتقان.

بويجەتكەن الماتىداعى "سىمبات" ديناين جانە ءسان اكادەمياسىنىڭ 4-كۋرسىندا وقىعان. ءوزىنىڭ اۆتورلىق كوللەكسياسى مەن ينتەرنەت دۇكەنى بولعان. سونداي-اق ءسان سالونىندا جۇمىس ىستەگەن.

19 ناۋرىز كۇنى كەشكە اياجان 20.48-دە جۇمىستان شىققان. جاتاقحانا ماڭىندار ونى ەر ادام توسىپ تۇرعان. 23.00-دە اياجاننىڭ تەلەفونىنان "شىعىپ جاتىرمىن" دەگەن حات جىبەرىلگەن. سول ءتۇنى اياجان جاتاقحاناعا ورالماعان.

اياجاننان حابار بولماعان سوڭ باسىندا سويلەسىپ جۇرگەن جىگىتى مەن قۇربىلارى دابىل قاعىپ، ەرتەسىنە تۋىستارىن تاۋىپ، ىزدەۋگە كوشكەن. اياجاننىڭ جاقىندارى ونىڭ بەلگىسىز ەر اداممەن كەزدەسۋىن ينتەرنەت دۇكەن جۇمىسىمەن بايلانىستىرادى. ەر اداممەن قارىم-قاتىناس قۇرۋ ءۇشىن كەزدەسكەن بولۋى مۇمكىن دەگەن نۇسقانى تەرىستەيدى. ويتكەنى اياجاننىڭ جىگىتى بولعانىن ايتادى.

20 ناۋرىزدا ەرتەمەن ىزدەۋ باستالىپ، تۇسكى 12 شاماسىندا جاقىندارى قىزدىڭ جوعالعانى تۋرالى ارىز جازۋ ءۇشىن پوليسياعا بارادى. الايدا ول جاقتاعىلار ميتينگكە بايلانىستى كۇشەيتۋ ءجۇرىپ جاتقانقانىن جەتكىزىپ، ارىزدى قابىلداۋدان باس تارتقان. كەزەكشى بولىمدەگىلەردىڭ ءبىرى "ول قۇربىلارىمەن نەمەسە جىگىتتەرمەن قىدىرىپ، ءبىر جەردە ۇيىقتاپ جاتىر. ويانعان سوڭ حابارلاسادى. ءبىز مۇندايدى كۇندە كورىپ ءجۇرمىز" دەگەن.

پوليسيادان شىققان جاقىندارى ىزدەۋدى ءوز بەتىنشە جالعاستىرعان. ىزدەۋگە دوستارى مەن ەرىكتىلەر قوسىلىپ، تاكسي قىزمەتتەرىنە حابارلاسا باستاعان. اياجاننىڭ اعاسى 20 ناۋرىزدا 15.00-دە 102 نومەرىنە حابارلاسىپ، قىزدىڭ جوعالعانى تۋرالى حابارلاعان.

21 ناۋرىزدا ەرىكتىلەر يندرايۆەر جۇرگىزۋشىسىن تاۋىپ، ول اياجاندى اپارعان جەردىڭ مەكەنجايىن ايتادى. تاكسيدى رۋسلان دەگەن بىرەۋدىڭ شاقىرعانىن ايتقان. ەرىكتىلەر مەكەنجايدى پوليسياعا حابارلاپ، ابونەتتىك نومەر بەكەتىنىڭ بازاسى ارقىلى ىزدەۋگە كوشكەن.

جاقىندارى تۇنگى 11-لەردە تاكسي كورسەتكەن مەكەنجايعا كەلگەندە ول جەردە پوليسەيلەر كوپتەپ جۇرگەن، پاتەرگە كىرگىزبەگەن. سالدەن سوڭ جەدەل جاردەم كولىگى كەلىپ، پاتەردەن ۇستىنە قان جۇققان ەر ادامدى الىپ شىققان.

ارتىنشا ارنايى ۋاكىل شىعىپ قىز پاتەردەن تابىلماعانىن ايتىپ، ەرتەڭگىسىن پوليسياعا كەلۋلەرىن سۇراعان.

22 ناۋرىز ساعات 12:00-دە جاقىندارى پوليسيادا بولعاندا، اعاسى جاڭالىقتاردان اياجاننىڭ ءولى تابىلعانىن وقىپ، پوليسەيلەردەن تۇسىنىك بەرۋدى سۇراعان. پوليسياداعىلار اياجان دەنەسىنىڭ بولىكتەرى 21 ناۋرىزدا پاتەردەن تابىلعانىن، ءبىراق ونى تۋىستارىنا قالاي ايتارىن بىلمەگەنىن جەتكىزگەن.

نەمولچيKZ قورىنا كۇدىكتى اككى قىلمىسكەر ەكەنىن، جاس قىزدىڭ دەنەسىن ابدەن جىلىكتەگەنىن حابارلادى. اياجاننىڭ اعاسى كۇدىكتىنىڭ مەديسينالىق ءبىلىمى بولعانىن، زيالى وتباسىدان شىققانىن، كورشىلەرى تاربيەلى بالا رەتىندە سيپاتتاعانىن ايتقان.

پوليسيا تاراتقان اقپاراتتىق حابارلامادان 1993 جىلى تۋعان ن. ەسىمدى كۇدىكتى قىزدى الاتاۋ اۋدانى نۇركەنت ىقشاماۋدانىنداعى تۇرعىنۇيلەردىڭ بىرىنە اپارعانى، پاتەر ەسىگىن بۇزىپ كىرگەن كەزدە كۇدىكتى وزىنە قول جۇمساۋعا ارەكەتتەنگەنى، قىلمىسىن 19 ناۋرىزدان 20-سىنا قاراعان ءتۇنى جاساعانى بەلگىلى بولدى. كۇدىكتى قىلمىسىنىڭ ءىزىن جاسىرۋ ءۇشىن دەنەنى جىلىكتەپ، كەي بولىگىن اۋداننان الىس جەرگە قوقىس جاشىگىنە تاستاعان.

قازىرگى ۋاقىتتا ۇستالعان 1993 جىلعى تۇركىستان وبلىسىنىڭ تۋماسى تەرگەلىپ جاتىر.

نەمولچيKZ قورى كۇدىكتى پسيحيكالىق ناۋقاس رەتىندە جازادان قاشىپ قۇتىلا ما دەپ الاڭداپ، مۇنداي قاتىگەز قىلمىس ءۇشىن كۇدىكتىنى ءومىر بويىنا باس بوستاندىعىنان ايىرۋدى تالاپ ەتۋدە.