باس پروكۋراتۋرا "اق جول" پارتياسى دەپۋتاتتارىنىڭ قازۇۋ اۋماعىنداعى جەر داۋىنا بايلانىستى ساۋالىنا جاۋاپ بەردى.

باس پروكۋراتۋرا مالىمەتىنشە، 2012 جىلعى 30 قاڭتاردا الماتى قالاسى اكىمدىگىنىڭ قاۋلىسىمەن ۋنيۆەرسيتەتكە الاڭى 73،26 گەكتار جەر ۋچاسكەسىن تۇراقتى جەر پايدالانۋ قۇقىعى بەرىلگەنى انىقتالعان.

2017 جىلعى 2 قازاندا قالا اكىمدىگىنىڭ قاۋلىسىمەن جەر الاڭى 1،8 گەكتارعا ازايعان.

"ۋچاسكەنىڭ ازايتىلعان بولىگىنىڭ 0،74 گەكتارى "Omirex" جشس-عا، 0،56 گەكتار جەر الماتى سۋ، الماتى جىلۋ جەلىلەرى، قازپوشتا، قازاقتەلەكوم سەكىلدى كوممۋنالدىق قىزمەتتەردىڭ قاراماعىنا، 0،52 گەكتار اۋماق ش.ا. مۇستافايەۆقا وتكەن. ش.ا. مۇستافايەۆتىڭ جەر ۇلەسى ۋنيۆەرسيتەتتىڭ وندىرىستىك ءۇي-جايلارىن كوپشىلىك ساۋدا-ساتتىقتا ساتىپ الۋ ناتيجەسىندە پايدا بولدى" دەلىنگەن پروكۋراتۋرا جاۋابىندا.

باس پروكۋراتۋرا ش.ا. مۇستافايەۆقا تيەسىلى وسى ءۇي-جايلاردى يەلىكتەن شىعارۋ زاڭدى تۇردە جۇزەگە اسىرىلعانىن، ال 0،74 گەكتارلىق ەكى ۋچاسكەنى "Omirex" جشس-عا بەرگەن كەزدە الماتى قالاسىنىڭ اكىمدىگى جەر كودەكسىنىڭ 48 جانە 82-باپتارىن بۇزعانىن ءارى ۋچاسكەنى ساۋدا-ساتتىقسىز جانە ولارعا ۋنيۆەرسيتەتتىڭ جەر پايدالانۋ قۇقىعى توقتاتىلعانعا دەيىن بەرگەنىن مالىمدەدى.

"انىقتالعان بۇزۋشىلىقتاردى قۇقىقتىق باعالاۋ بويىنشا وكىلەتتىك اۋىل شارۋاشىلىعى مينيسترلىگىنىڭ جەر رەسۋرستارىن باسقارۋ كوميتەتىنە جاتاتىنىن ەسكەرە وتىرىپ، 19.03.2021 جىلى الماتى قالاسىنىڭ پروكۋراتۋراسى ولاردىڭ مەكەنجايىنا ءتيىستى تەكسەرۋدى ۇيىمداستىرۋ تۋرالى حات جولدادى "دەپ حابارلادى باس پروكۋراتۋرا.

باس پروكۋراتۋرا جاۋابىنا باس پروكۋروردىڭ مىندەتىن اتقارۋشى  ب.ن.اسىلوۆ قول قويعان. جاۋاپ قوسىمشاسىنا باس پروكۋرور عابيت نۇرداۋلەتوۆ 20-29 ناۋرىز ارالىعىندا ەڭبەك دەمالىسىندا جۇرگەنى جازىلعان.