تۇركىتىلدەس ەلدەردىڭ بەيرەسمي سامميتىندە پرەزيدەنت قاسىم-جومارت توقايەۆ تۇركىستان وڭىرىندە تۇركى ەلدەرىنىڭ بىرلەسكەن "ارنايى ەكونوميكالىق ايماعىن" قۇرۋدى ۇسىندى.
– پاندەميا بۇرىن-سوڭدى بولماعان ەكونوميكالىق داعدارىسقا اكەپ سوقتىردى. ىندەتتىڭ سالدارىنان ءوزارا ساۋدا اينالىمى ازايىپ كەتتى. ناقتى ايتقاندا، قازاقستان مەن تۇركى كەڭەسىنە مۇشە ەلدەر اراسىنداعى ساۋدا-ساتتىق كولەمى بىلتىر شامامەن 7 ميلليارد دوللار بولدى. بۇل – پاندەمياعا دەيىنگى كورسەتكىشتەن 11،2 پايىزعا تومەن. سوندىقتان، ءبىزدىڭ ەلدەرىمىز ءۇشىن الىس-بەرىستى ۇلعايتا ءتۇسۋ – باستى مىندەتتىڭ ءبىرى. وسى ورايدا، توعىز جولدىڭ تورابىندا ورنالاسقان تۇركىستاننىڭ ينۆەستيسيالىق جانە ساۋدا-ەكونوميكالىق مۇمكىندىگى زور. ونىڭ قوماقتى تابيعي رەسۋرسىن، ادامي كاپيتالى مەن تۋريستىك الەۋەتىن ەسكەرىپ، تۇركىستان وڭىرىندە تۇركى ەلدەرىنىڭ بىرلەسكەن "ارنايى ەكونوميكالىق ايماعىن" قۇرۋدى ۇسىنامىن، – دەدى ول.
سونىمەن قاتار پرەزيدەنت ترانسشەكارالىق سۋ رەسۋرستارىن ءتيىمدى پايدالانۋ – ەل تۇراقتىلىعى مەن وسىپ-وركەندەۋىنىڭ كەپىلى ەكەنىن ايتتى. وسى ورايدا، سامميتكە قاتىسۋشى ەلدەرمەن بىرلەسە گيدروقۇرىلىمدار سالۋ جوبالارىنا اتسالىسۋعا دايىن ەكەنىن اتاپ ءوتتى.
پىكىر قالدىرۋ