ىندەتتى توقتاتۋدىڭ بىردەن-بىر جولى – ازاماتتارىمىزدى ۆاكسينامەن جاپپاي قامتاماسىز ەتۋ. بۇل تۋرالى پرەزيدەنت قاسىم-جومارت توقايەۆ تۇركىتىلدەس مەملەكەتتەردىڭ بەيرەسمي سامميتىندە ايتتى.

– بىلتىردان بەرى بۇكىل الەم تەڭدەسسىز سىن-قاتەرلەرمەن كۇرەسىپ كەلەدى. سوعان قاراماستان، تۇركىتىلدەس مەملەكەتتەردىڭ ىنتىماقتاستىعى جالپى العاندا باسەڭدەگەن جوق. بۇگىنگى وتىرىس – سونىڭ دالەلى. الايدا كۇردەلى كەزەڭدە قارىم-قاتىناسىمىزعا تىڭ سەرپىن بەرۋ جولدارىن بىرلەسىپ ويلاستىرۋىمىز قاجەت، – دەدى پرەزيدەنت.

ول وسى ماقساتتا باسا نازار اۋدارۋ كەرەك ماسەلەلەردى ايتتى.

– ىندەتتى توقتاتۋدىڭ بىردەن-بىر جولى – ازاماتتارىمىزدى ۆاكسينامەن جاپپاي قامتاماسىز ەتۋ ەكەنى ايدان انىق. ءبىزدىڭ ەلدەرىمىز دە ەكپە شىعارۋدى قولعا الدى. ورتاق مۇددەگە ساي تاجىريبە ءبولىسىپ، ءبىر-بىرىمىزدى قولداۋىمىز قاجەت دەپ سانايمىن.

وكىنىشكە قاراي، حالىقارالىق قاۋىمداستىق پاندەمياعا قارسى كۇرەس كەزىندە تۇتاسىپ ارەكەت ەتە المادى. نەگىزگى ءىرى مەملەكەتتەر اراسىندا قايشىلىقتار تۋىنداپ، ۆاكسينالىق قاقتىعىس باستالىپ كەتتى. بىرىككەن ۇلتتار ۇيىمى دا وسىنداي كۇردەلى جاعدايدا ءوز الەۋەتىن كورسەتە المادى، – دەدى توقايەۆ.

ونىڭ ايتۋىنشا، بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋ تۋرالى باستاما بولاشاقتا بيولوگيالىق قاتەردىڭ الدىن الۋعا مۇمكىندىك بەرەدى.

– وسى كۇردەلى كەزەڭدە دەنساۋلىق ساقتاۋ جانە بيوقاۋىپسىزدىك ماسەلەسىنىڭ ماڭىزى ارتا ءتۇستى. بۇل رەتتە بىرىككەن ۇلتتار ۇيىمى باس اسسامبلەياسىنىڭ 75ء-شى سەسسياسىندا قازاقستان بيولوگيالىق قاۋىپسىزدىك جونىندەگى حالىقارالىق اگەنتتىك قۇرۋ تۋرالى باستاما كوتەرگەنى بەلگىلى. سىزدەر وسى تىڭ يدەيانى قولدايسىزدار دەپ سەنەمىن. اگەنتتىك بولاشاقتا بيولوگيالىق قاتەردىڭ الدىن الۋعا جانە ءقاۋىپتى دەرت بويىنشا مالىمەت الماسۋعا مۇمكىندىك بەرەرى ءسوزسىز، – دەدى ول.