تۇركىستان وبلىسىنىڭ پوليسەيلەرى قىمبات اۆتوكولىك ۇرلاۋمەن اينالىسقان ءتورت كۇدىكتىنى انىقتادى، دەپ حابارلادى Polisia.kz.
تۇركىستان قالالىق پوليسيا باسقارماسىنا جەرگىلىكتى تۇرعىن بەلگىسىز ادامدار ونىڭ "Toyota Camry 55" ماركالى اۆتوكولىگىن ۇرلاپ كەتكەنى تۋرالى ارىزدانعان. پوليسەيلەر بىردەن وقيعا ورنىنا كەلىپ، كۇدىكتىلەردى جەدەل ىزدەستىرۋگە كىرىسكەن.
ناتيجەسىندە ۇرلانعان اۆتوكولىك شىمكەنت قالاسىنان تابىلدى. ونى كۇدىكتىلەر ءتورت ميلليون تەڭگەگە ساتىپ ۇلگەرگەن. ال اۆتوكولىكتىڭ ەسىگىن، ەلەكتروندىق سكانەر اپپاراتى ارقىلى اشقان.
– ارنايى جۇرگىزىلگەن وپەراسيا ناتيجەسىندە ءبىزدىڭ جەدەل ۋاكىلدەر ءتورت كۇدىكتىنى ۇستادى. ولاردىڭ تورتەۋى اقتوبە وبلىسىنىڭ تۇرعىندارى، ونىڭ ىشىندە ەكەۋى دەسترۋكتيۆتى ءدىني اعىمنىڭ مۇشەلەرى بولىپ شىقتى. ۇستالعانداردىڭ ۇشەۋى بۇرىن قاراقشىلىق جانە قارۋ ساقتاعانى ءۇشىن سوتتالعان. كۇدىكتىلەر قاماۋعا الىندى. تەرگەۋ بارىسىندا قىلمىستىق توپ مۇشەلەرىنىڭ الدىن-الا جوسپارلانعان سىزبا بويىنشا، ءارقايسىسى ءوز ءرولىن سومداۋ ارقىلى ارەكەت ەتكەنى انىقتالدى. كۇدىكتىلەر قۇنى 10 ميلليون تەڭگەدەن اساتىن اۆتوكولىكتەردى ارنايى سكانەرلەۋ قۇرىلعىسىنىڭ كومەگىمەن اشقان. ولار اۆتوكولىك يەلەرىن باقىلاپ، ەسىكتەرىن اشقان كەزدە ەلەكتروندى قۇلىپتاردى سكانەرلەگەن. سەزىكتىلەر قىمبات كولىككە قول جەتكىزگەننەن كەيىن، ولاردى تۇراقتان نەمەسە كوشەلەردەن ۇرلاپ، ايداپ اكەتكەن. تەرگەۋ بۇگىنگى كۇنى كۇدىكتىلەردىڭ اۆتوكولىك ۇرلىعىنىڭ جالپى بەس دەرەگىنە قاتىسى بارى انىقتادى. ولار بەس قىلمىستىڭ ەكەۋىن اقتوبە وبلىسىندا، ەكەۋىن تۇركىستان وبلىسىندا جانە بىرەۋىن قىزىلوردا وبلىسىندا جاساعان. قازىرگى ۋاقىتتا سوتقا دەيىنگى تەرگەۋ جۇمىستارى جالعاسۋدا. سونداي-اق كۇدىكتىلەردىڭ باسقا دا وسىنداي قىلمىستارعا قاتىسى بار-جوعى انىقتالۋدا، – دەدى تۇركىستان وبلىسى پوليسيا دەپارتامەنتى باستىعىنىڭ ورىنباسارى قۇرمانبەك ساحوۆ
پىكىر قالدىرۋ