بيىل ءساۋىر، مامىر جانە ماۋسىم ايلارىندا وڭىرلەردە اي سايىن 2 ملن ادامعا ۆاكسينا سالۋ مۇمكىندىگى قامتاماسىز ەتىلەدى. بۇل تۋرالى ۇكىمەت وتىرىسىندا پرەمەر-مينيستر اسقار مامين ايتتى.
– قازىرگى ءبىزدىڭ باستى مىندەتىمىز – سانيتارلىق-ەپيدەميولوگيالىق جاعدايدى تۇراقتاندىرۋ جانە ۆاكسينا سالعانداردىڭ سانىن ارتتىرۋ. وسى باعىتتا ناقتى جۇمىس ۇيىمداستىرىلدى. مينيسترلىك ۆاكسيناسيالاۋ بويىنشا جوسپار ازىرلەدى. بيىل ءساۋىر، مامىر جانە ماۋسىم ايلار ارالىعىندا وڭىرلەردە اي سايىن 2 ملن ادامعا ۆاكسينا سالۋ مۇمكىندىگى قامتاماسىز ەتىلەدى.
قىركۇيەك ايىندا 10 ميلليونعا جۋىق ادامعا ۆاكسينا سالۋدى اياقتاۋدى جوسپارلاپ وتىرمىز. سودان كەيىن ۇجىمدىق يممۋنيتەتتىڭ جيناقتاۋشى اسەرى كۇتىلەدى، – دەدى ۇكىمەت باسشىسى.
سونىمەن قاتار مامين مينيسترلىكتەر مەن اكىمدىكتەرگە ءبىرقاتار تاپسىرمالار بەردى.
– دەنساۋلىق ساقتاۋ مينيسترلىگىنە، اكىمدىكتەرگە ۆاكسينا الاتىنداردىڭ سانىن ارتتىرۋ بويىنشا ءىس-شارالار قابىلداۋدى جانە وڭىرلەرگە ۆاكسيناسيالاۋ جوسپارىنا سايكەس ۆاكسينانى جەتكىزۋدى قامتاماسىز ەتۋدى تاپسىرامىن.
اقپارات جانە قوعامدىق دامۋ مينيسترلىگى مەديا-جوسپاردى جاڭارتسىن جانە دەنساۋلىق ساقتاۋ مينيسترلىگىمەن، اكىمدىكتەرمەن بىرلەسىپ ۆاكسيناسيالاۋدىڭ ماڭىزدىلىعى تۋرالى ءاقپاراتتىق-تۇسىندىرۋ جۇمىستارىن كەڭىنەن جۇرگىزسىن، – دەدى پرەمەر-مينيستر ۇكىمەت وتىرىسىندا.
