دەنساۋلىق ساقتاۋ ءبىرىنشى ۆيسە-مينيسترى مارات شورانوۆ ەلدەگى ۆاكسيناسيانىڭ جۇرگىزىلۋ بارىسى تۋرالى ايتتى. بۇل تۋرالى ول ورتالىق كوممۋنيكاسيالار الاڭىنداعى بريفينگتە مالىمدەدى.

– كوروناۆيرۋس ينفەكسياسىنا قارسى ۆاكسيناسيا جالعاسۋدا. ءبىرىنشى ساۋىردەن باستاپ ۆاكسيناسيالاۋعا جاتاتىن ادامداردىڭ ساناتتارى كەڭەيتىلدى. كەستەلەردى جەرگىلىكتى اتقارۋشى ورگاندار جاسايدى. بۇگىنگى تاڭدا ءبىرىنشى كومپونەنت 435 مىڭ ازاماتقا ەگىلدى، ەكىنشى كومپونەنت 107 مىڭنان استام قازاقستاندىق ەگىلدى، – دەدى دەنساۋلىق ساقتاۋ ءبىرىنشى ۆيسە-مينيسترى.

ونىڭ ايتۋىنشا، ءساۋىر ايىنىڭ باسىنان باستاپ وڭىرلەرگە "سپۋتنيك V" ۆاكسيناسىنىڭ 923 مىڭنان استام دوزاسى جەتكىزىلگەن.  

– ءساۋىر ايىنىڭ سوڭىنا دەيىن 910 مىڭ دوزا، باسقا وندىرۋشىلەردىڭ 500 مىڭ دوزاسى جانە 25 مىڭ "QazVac" ۆاكسيناسىن جەتكىزۋ جوسپارلانۋدا. بۇل ەلدىڭ شامامەن 2 ملن  ازاماتىن ۆاكسيناسيالاۋعا مۇمكىندىك بەرەدى، – دەدى م. شورانوۆ.