ماس كۇيىندە جانجال شىعارعان شقو مادەنيەت باسقارماسىنىڭ باسشىسى ميراس جۇماعۇلوۆ قىزمەتتەن بوساتىلدى. بۇل تۋرالى مەملەكەتتىك قىزمەت ىستەرى اگەنتتىگىنىڭ شىعىس قازاقستان وبلىسى بويىنشا دەپارتامەنتىنىڭ حابارلاماسىندا ايتىلدى.
"وڭىرلىك مەملەكەتتىك قىزمەتتىڭ شىعىس قازاقستان وبلىسى بويىنشا دەپارتامەنتىنىڭ ۇسىنىسىنان كەيىن شىعىس قازاقستان وبلىسىنىڭ اكىمى دانيال احمەتوۆ وبلىستىق مادەنيەت باسقارماسىنىڭ باستىعى ميراس جۇماعۇلوۆتى قىزمەتىنەن بوساتۋ تۋرالى شەشىم قابىلدادى. ءتيىستى بۇيرىق 2021 جىلى 13 ساۋىردە شىعارىلدى" دەلىنگەن مەملەكەتتىك قىزمەت ىستەرى اگەنتتىگىنىڭ شىعىس قازاقستان وبلىسى بويىنشا دەپارتامەنتىنىڭ حابارلاماسىندا.
بۇعان دەيىن مادەنيەت باسقارماسىنىڭ باسشىسى وسكەمەندەگى كاراوكەلەردىڭ بىرىندە اناستاسيا ەسىمدى بويجەتكەنمەن سويلەسىپ، ەكەۋى جۇماعۇلوۆتىڭ ۇيىنە بارۋعا كەلىسكەنى، الايدا ۇيگە كىرەبەرىستە بويجەتكەن ىشكى كىرۋدەن باس تارتىپ، جۇماعۇلوۆپەن جانجالداسقانى حابارلانعان. قورىققان بيكە پوليسيا شاقىرماق بولعاندا، جۇماعۇلوۆ ونىڭ تەلەفونىن تارتىپ العان.
بولعان جايتتى كورگەن كورشىلەر پوليسيا شاقىرعان. پوليسيا كوشەدە الكوگولدىك سۋسىن ىشكەنى، ماس جاعدايدا قوعامدىق ورىندا جۇرگەنى ءۇشىن وقيعانىڭ ەكى قاتىسۋشىسىنا حاتتاما تولتىرعان.
Ratel.kz سايتى جۇماعۇلوۆپەن سوزگە كەلىپ قالعان بويجەتكەن دە شىعىس قازاقستان وبلىسى اكىمدىگىنىڭ قىزمەتكەرى ەكەنىن حابارلاعان.
پىكىر قالدىرۋ