پرەزيدەنت قاسىم-جومارت توقايەۆتىڭ تاپسىرماسىمەن بىرنەشە شەنەۋنىك قىزمەتىنەن بوساتىلدى. بۇل تۋرالى پرەزيدەنتتىڭ باسپا ءسوز حاتشىسى بەرىك ءۋالي facebook پاراقشاسىندا حابارلادى.
– پرەزيدەنت قاسىم-جومارت توقايەۆتىڭ تاپسىرماسى بويىنشا رەسپۋبليكالىق جانە جەرگىلىكتى جولداردىڭ قۇرىلىسى مەن جوندەۋ جۇمىستارىن رەتكە كەلتىرۋ جالعاسىپ جاتىر. وسى سالاداعى جۇمىستاردى جانە باقىلاۋدى بوساڭسىتىپ العانى ءۇشىن يندۋستريا جانە ينفراقۇرىلىمدىق دامۋ مينيسترلىگى اۆتوموبيل جولدارى كوميتەتىنىڭ ءتوراعاسى س.بارماقوۆ، باتىس قازاقستان، سولتۇستىك قازاقستان جانە اقتوبە وبلىستارى اكىمدەرىنىڭ ورىنباسارلارى ت.شاكىموۆ، ي.تۋركوۆ جانە ن.قالاۋوۆتار قىزمەتىنەن بوساتىلدى، – دەپ جازدى بەرىك ءۋالي.
ونىڭ ايتۋىنشا، ۇكىمەت، اكىمدەر، قۇقىق قورعاۋ ورگاندارى بيۋدجەت قارجىسىنىڭ ءتيىمسىز جۇمسالۋىنىڭ الدىن الۋ، جول قۇرىلىسى سالاسىنداعى كەلەڭسىزدىكتەردى جويۋ ءۇشىن شارالار قابىلداپ جاتىر.
پىكىر قالدىرۋ