شاعىن جيناقتى مەكتەپ پەداگوگتەر جالاقىسىن جاڭاشا تولەۋ جۇيەسىنە كوشىرۋ جوسپارلانىپ وتىر. بۇل تۋرالى ۇكىمەت وتىرىسىندا ءبىلىم جانە عىلىم ءمينيسترى اسحات ايماعامبەتوۆ مالىمدەدى.
– 2025 جىلعا قاراي اۋىل مەكتەپتەرىن بىلىكتى پەداگوگتەرمەن 100 پايىز قامتاماسىز ەتۋىمىز قاجەت. وسى تۇرعىدا شاعىن جيناقتى مەكتەپتەردەگى پەداگوگتەر جالاقىسىن جاڭاشا تولەۋ جۇيەسىنە كوشىرۋدى جوسپارلاپ وتىرمىز، – دەدى ايماعامبەتوۆ.
مينيستر اۋىلعا جۇمىسقا كەلگەن جاس مامانداردى ىنتالاندىرۋ ءۇشىن جۇمىستى وتەۋ مەرزىمىن قىسقارتۋ قاراستىرىلىپ جاتقانىن ايتتى.
– 2021 جىلدان باستاپ 18 ساعاتتىق جۇكتەمەدەن 16 ساعاتتىق جۇكتەمەگە، 2024 جىلدان باستاپ جاڭا جۇيەگە كوشۋىمىز قاجەت. سونىمەن قاتار اۋىلعا جۇمىسقا كەلگەن قالادا وقىعان جاس مامانداردى ىنتالاندىرۋ ءۇشىن جۇمىستى وتەۋ مەرزىمىن قىسقارتۋ، ال وقۋشىلار ءۇشىن "سيفرلىق رەپەتيتور" جوباسىن ەنگىزۋ قاراستىرىلىپ جاتىر، – دەدى ول.
پىكىر قالدىرۋ