امەريكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى ۋيليام ح. موزەر ونلاين فورماتتا قازاقستاندىق بۇقارالىق اقپارات قۇرالدارى وكىلدەرىمەن كەزدەستى. كەزدەسۋ بارىسىندا قوس ەل ىنتىماقتاستىعىنىڭ 30 جىلدىق تاريحىنداعى اتقارىلعان كەي ىستەر بايان ەتىلدى.

ۋيليام موزەر 1990 جىلداردان بەرى اقش قازاقستان ەكونوميكاسىنا 30-35 ملرد دوللار كولەمىندە ينۆەستيسيا سالعانىن، بۇل ءۇردىس كەلەشەكتە دە جالعاساتىنىن ايتتى. ونىڭ سوزىنشە، اقش تاراپىنان سالىنعان ينۆەستيسيا بۇرىن نەگىزىنەن مۇناي سالاسىنا باعىتتالسا، ەندى اۋىلشارۋاشىلىعى، ءىت سالاعا دا قاراجات تارتۋ ماسەلەسى قاراستىرىلىپ وتىر. ەلشى ول ءۇشىن قازاقستان ۇكىمەتى بيزنەسكە قولايلى ىسكەرلىك ورتا قالىپتاستىراتىنىنا سەنىم ءبىلدىردى.

سونداي-اق ۋيليام موزەر اقش پەن قازاقستان اراسىندا ۆيزاسىز رەجيم ەنگىزۋ بۇگىنگى پاندەميا جاعدايىندا قاراستىرىلىپ وتىرماعانىن، ىقتىماقتاستىق ماسەلەسىندە بۇدان دا ماڭىزدى ماسەلەلەر كوپ ەكەنىن جەتكىزدى.

ەلشى سونىمەن قاتار اقش-تا كوروناۆيرۋسقا قارسى ۆاكسيناسيا قارقىندى ءجۇرىپ جاتقانىن، ازاماتتار ۆاكسيناسيامەن تولىق قامتىلىپ بولعان سوڭ ونى باسقا ەلدەرگە شىعارۋ جوسپارلانىپ وتىرعانىن ءمالىم ەتتى. ۋيليام موزەر ءوزى Moderna ۆاكسيناسىن سالدىرعان. ايتۋىنشا، ەكپەنى وڭ قولىنا سالدىرعانىمەن، سول قولى ازداپ سىزداعان. ول ۆاكسينادان كەيىنگى جايسىزدىق ۇزاققا سوزىلمايتىنىن جەتكىزىپ، قازاقستان حالقىن ۆاكسينا سالدىرۋعا شاقىردى.

جيىن بارىسىندا ۋيليام موزەر قازاق ءتىلىن ىقىلاسپەن ۇيرەنىپ جۇرگەنىن اتاپ ءوتتى.