پرەزيدەنت قاسىم-جومارت توقايەۆ قازاقستاندا شىعارىلعان QazVac ۆاكسيناسى ايماقتارعا جەتكىزىلە باستاعانىن ايتتى. بۇل تۋرالى ول الەۋمەتتىك جەلىدەگى پاراقشاسىندا حابارلادى.
– QazVac ۆاكسيناسى ەلىمىزدىڭ وڭىرلەرىنە جەتكىزىلە باستادى. بارلىق ازاماتتارعا قولجەتىمدى بولۋ ءۇشىن وتاندىق ەكپە ءوندىرىسىن ۇلعايتامىز. قازاقستان الەم بويىنشا ءوز ۆاكسيناسىن شىعارعان بىرنەشە ەلدىڭ قاتارىندا. ەكپەنى ازىرلەگەن عالىمدار مەن مامانداردىڭ بارىنە العىس ايتامىن، – دەدى پرەزيدەنت.
بۇعان دەيىن "QazVac" ۆاكسيناسىنىڭ العاشقى 50 مىڭ دوزاسى "سق-فارماسيانىڭ" حابتارىنا تاراتىلىپ، ودان ءارى ەلدىڭ بارلىق وڭىرلەرىندەگى دەنساۋلىق ساقتاۋ باسقارمالارىنىڭ قويمالارىنا جەتكىزىلەتىنى حابارلانعان.
پرەمەر-مينيستر سايتىنىڭ مالىمەتىنشە، 26 ساۋىردە ەلدە "QazVac" ۆاكسيناسىمەن ۆاكسيناسيالاۋ باستالادى. مامىر ايىندا 50 مىڭ دوزا كولەمىندەگى ۆاكسينانىڭ كەزەكتى پارتياسى شىعارىلماق. ۆاكسينا ءوندىرىسى كەزەڭ-كەزەڭمەن ايىنا 500-600 مىڭ دوزاعا دەيىن ۇلعايتىلادى دەپ كۇتىلۋدە.
قازاقستاندا كوروناۆيرۋسقا قارسى جاپپاي ۆاكسيناسيا 1 اقپاندا باستالدى. 2021 جىلعى 23 ساۋىردەگى مالىمەت بويىنشا 823 498 ادام ۆاكسينا سالدىرعان. بۇگىندە ازاماتتارعا رەسەيلىك سپۋتنيك-V ەكپەسى سالىنىپ جاتىر. بريتانيالىق "The Lancet" مەديسينالىق عىلىمي جۋرنالى "سپۋتنيك V" ۆاكسيناسى 91،6 پايىزعا ءتيىمدى ەكەنىن ءمالىم ەتكەن.
پىكىر قالدىرۋ