قورعانىس ءمينيسترى ۆەدومستۆونىڭ بيىلعى جىلدىڭ ءبىرىنشى توقسانىندا اتقارعان جۇمىسىنىڭ قورىتىندىسى، اسكەردىڭ جاۋىنگەرلىك دايىندىعى مەن ءتارتىبى، سونداي-اق سىبايلاس جەمقورلىققا قارسى قابىلدانىپ جاتقان شارالار تۋرالى باياندادى.
كەزدەسۋ بارىسىندا نۇرلان ەرمەكبايەۆ اسكەري مەديسينانىڭ پتر-زەرتحانالارمەن قامتىلۋى جايىندا ايتتى.
ءمينيستردىڭ سوزىنشە، نۇر-سۇلتان جانە الماتى قالالارىندا ەكى زەرتحانا ىسكە قوسىلعان، ال اقتاۋ مەن سەمەيدە ءموبيلدى كەشەن جۇمىس ىستەپ تۇر. وفيسەرلەر مەن ساربازدارعا ۆاكسينا سالۋ جالعاسۋدا. بۇگىندە قارۋلى كۇشتەر قۇرامىنىڭ 20 پايىزىنا ەكپە ەگىلگەن.
مينيستر مەملەكەت باسشىسىنا "التىن جەبە" ارنايى وپەراسياسى جانە "قالقان-2021" ۆەدومستۆوارالىق كەشەندى وقۋ-جاتتىعۋ جيىندارىنىڭ ناتيجەلەرى، سونداي-اق، ەكىنشى جارتىجىلدىققا جوسپارلانعان "وتپانتاۋ" ستراتەگيالىق وقۋ-جاتتىعۋعا دايىندىق جونىندە ەسەپ بەردى.
ەرمەكبايەۆ توقايەۆقا قازاقستاننىڭ حالىقارالىق اسكەري ىنتىماقتاستىق باعىتتارى، قارۋلى كۇشتەردى اسكەري تەحنيكامەن جابدىقتاۋ، قارۋلى كۇشتەردىڭ تۇجىرىمداماسىن دامىتۋ جۇمىستارى تۋرالى ايتتى.
كەزدەسۋ سوڭىندا جوعارعى باس قولباسشى قورعانىس مينيسترىنە ەلىمىزدىڭ قورعانىس قابىلەتىن ودان ءارى ارتتىرۋعا باعىتتالعان ءبىرقاتار تاپسىرما بەردى.
پىكىر قالدىرۋ