ءماجىلىس دەپۋتاتى ەلنۇر بەيسەنبايەۆ جۋرناليست نارتاي ارالبايۇلىنا بەرگەن سۇحباتتا قوعام بەلسەندىسى جانبولات ماماي تۋرالى "ول ساياساتكەر ەمەس، ال كوتەرگەن باستامالارى پوپۋليستىك ارەكەتتەن ارى اسپايدى" دەپ ايتتى.

– ساياساتكەر دەگەن ماسەلەنى شەشۋشى ادام نەمەسە ناقتى شەشەتىن جولدارىن كورسەتەتىن ادام. ماماي نە ۇسىندى؟ ونىڭ دەمپارتياسىنىڭ باعدارلاماسىن وقىدىڭىز با، كوزبەن كوردىڭىز با؟ كرەديتتىك امنيستيا جۇرگىزۋ كەرەك دەگەندى ايتىپ ءجۇر. حالىقتىڭ نەسيەسىن تولىق كەشىرۋ كەرەك دەيدى. بىزدە ونداي مۇمكىندىك بار دەيدى. كىم كەشىرەدى ونى، بانكتەر كەشىرە مە؟ ال بانكتەردىڭ شەتەلدەگى قارىزدارىن سوسىن كىم كەشىرەدى؟ ءبىزدىڭ بانكتەر حالىققا نەسيە بەرۋ ءۇشىن شەتەلدەن وزدەرى دە نەسيە الادى. ونى سوسىن كىم تولەيدى، جانبولات قالتاسىنان تولەي مە؟ ساياساتتان الىستاۋ ادامداردى وسىنداي ىسىمەن قاسىنا تارتىپ، توپ ۇيىمداستىرۋ دەپ باعا بەرەمىن، – دەدى ەلنۇر بەيسەنبايەۆ سۇحبات بارىسىندا.

سونداي-اق ول جانبولات مامايدىڭ Nur Otan پارتياسى ءتوراعاسىنىڭ ءبىرىنشى ورىنباسارى باۋىرجان بايبەككە قاتىستى جاريالاعان ۆيدەوماتەريالىنا قاتىستى دا پىكىر ءبىلدىردى. بۇعان دەيىن ب.بايبەك ج.مامايدىڭ ايىپتارىن تەرىسكە شىعارىپ، ونى جاعىلعان جالا ەكەنىن ايتقان بولاتىن. قوعام بەلسەندىسىن سوتقا بەرەتىنىن دە رەسمي مالىمدەگەن..

– جانبولات ماماي باۋىرجان بايبەككە قاتىستى تاعى ءبىر ۆيدەو شىعارىپ، ونى دەباتقا شاقىرىپتى. بۇل ساسقان ۇيرەك ارتىمەن جۇزەدى دەگەننىڭ كەيپى. قانداي دەبات، ادامعا جالا جاپتىڭ با، ەندى سوتتىڭ الدىندا جاۋاپ بەر. ايتىلعان ءسوز – اتىلعان وق. زاڭ ساياساتكەرگە دە، قاراپايىم ادامدارعا ورتاق، – دەگەن ە.بەيسەنبايەۆ جانبولات مامايدى دەباتقا شاقىرىپ، كەز كەلگەن تاقىرىپتا ءسوز تالاستىرۋعا دايىن ەكەنىن مالىمدەدى.

دەموكراتيالىق پارتيا باستاماشىل توبىنىڭ جەتەكشىسى جانبولات ماماي پاندەميا كەزىندە حالىقتىڭ ءال-اۋقاتى ناشارلاپ كەتكەندىكتەن، ءبىر رەتتىك نەسيە امنيستياسىن جاريالاۋ باستاماسىن كوتەرىپ ءجۇر.

ب.بايبەك-ج.ماماي تەكەتىرەسى بەلسەندىنىڭ NurOtan پارتياسى ءتوراعاسىنىڭ ورىنباسارى تۋرالى ەكى تىلدە ۆيدەوماتەريال جاريالاۋىنان باستالعان. جانبولات ماماي ول جەردە UZUN Qulaq تەلەگرام كانالىندا، اشىق دەرەككوزدەردە، ءبىرقاتار باسپا ءسوز بەتتەرىندە جاريالانعان اقپاراتتاردى، دەرەكتەردى نەگىزگە الىپ، ب.بايبەكتى الماتى اكىمى بولىپ تۇرعاندا "بيۋدجەت اقشاسىن "جەپ" ميللياردەر اتاندى" دەپ ايىپتايدى. بۇعان جاۋاپ رەتىندە ب.بايبەك NurOtan پارتياسىنىڭ ەكس-دەپۋتاتى، بۇگىندە youtube جەلىسىندە ۆيدەوبلوگ تۇسىرۋمەن اينالىسىپ جۇرگەن تاڭىربەرگەن بەردوڭعارعا سۇحبات بەرىپ، وپپوزيسيونەردىڭ ايىپتارىن تەرىستەپ، ونى سوتقا بەرەتىنىن ءمالىم ەتتى. مۇنان سوڭ جانبولات ماماي قازاقستان سوتى ءوزىن جىعىپ بەرەتىنىن ايتىپ، بايبەكتى تىكەلەي ەفير رەجيمىندە اشىق دەباتقا شىعۋعا شاقىرعان.