الماتىداعى شوقان ءۋاليحانوۆ اتىنداعى الاڭدا دەموكراتيالىق پارتيا باستاماشىل توبى مەن ونىڭ جاقتاستارىنىڭ جەر ساتۋعا قارسى ميتينگى باستالدى.

الماتى سانيتارلىق-ەپيدەميولوگيالىق باقىلاۋ دەپارتامەنتى ەلدەگى ەپيدەميولوگيالىق جاعدايعا بايلانىستى ميتينگ وتكىزۋگە رۇقسات بەرمەگەن. الايدا وقيعا ورنىندا جۇرگەن قامشى تىلشىلەرى الاڭعا 200-گە جۋىق ادام جينالعانىن جەتكىزدى. 

ميتينگكە شىققانداردىڭ قولدارىنداعى پلاكاتتاردا "قازاقستاننىڭ جەرىن ساتپاڭدار"، "ساڭىراۋ پرەزيدەنت كەرەك ەمەس"، "ورماندى قازاق تا وسىرە الادى"، "جۇڭگو، جەرىمىزگە كوز سالما"، "قىتايعا جەر بەرۋ – ۇلتتىق ساتقىندىق" دەپ جازىلعان. 

بەلسەندىلەر شەرۋمەن رەسپۋبليكا الاڭىنا قاراي جۇرە باستاعاندا، ارنايى جاساق توقتاتىپ تاستادى.

ميتينگ ءوتىپ جاتقان الاڭدا ينتەرنەت بۇعاتتالعان جانە پوليسيا قىزمەتكەرلەرى مەن ارنايى سانيتارلىق ماماندار ءجۇر. 

ميتينگكە دەمپارتيا وكىلدەرىنەن بولەك قوعام قايراتكەرى، جۋرناليست رىسبەك سارسەنباي ۇلى، ساياساتكەر تولەگەن جوكەيەۆ، بەلسەندى رىسبەك توقتاسىن جانە بەلگىلى رەجيسسەر ەركىن راقىشيەۆ شىققان.

سونىمەن قاتار "ءبىرتۇتاس جەلتوقسان ۇيىمىنىڭ مۇشەلەرىمىز" دەپ تانىستىرعان ءبىر توپ ادام قولدارىنا “جەر كوميسسياسى تاراتىلسىن”، “جەر يەسى – حالىق" دەپ پلاكات الىپ شىققان.