ماڭعىستاۋ وبلىسىندا زاڭسىز اڭ اۋلاعان ەكى پوليسەي جۇمىستان بوساتىلدى. بۇل تۋرالى وبلىستىق پوليسيا دەپارتامەنتىنىڭ باستىعى جاناربەك باقتىبايەۆ مالىمدەدى.
– 26 ءساۋىر 2021 جىلى الەۋمەتتىك جەلىلەردە ماڭعىستاۋ وبلىسىندا براكونەرلەردىڭ ىزىنە ءتۇسىپ قۋعانى بەينەلەنگەن بەينەروليك تارالعان بولاتىن. ولاردىڭ اراسىندا ىشكى ىستەر ورگاندارىنان ەكى پوليسيا قىزمەتكەرى بولدى. ءبىزدىڭ قاتارىمىزدا مۇنداي قىزمەتكەرلەرگە ورىن جوق. بۇل وقيعادان كەيىن ەكى قىزمەتكەر دە ورنىنان بوساتىلدى. براكونەرلىكتىڭ بىردە-بىر فاكتىسى جازاسىز قالمايتىنىن، ال قىلمىسكەر قاراپايىم ادام نەمەسە قۇقىق قورعاۋ ورگاندارىنىڭ قىزمەتكەرى بولۋىنا قاراماستان جازالاناتىنىن مالىمدەگىم كەلەدى. زاڭ بارشاعا ورتاق، – دەپ جازدى facebook پاراقشاسىندا وبلىستىق پوليسيا دەپارتامەنتىنىڭ باسشىسى جاناربەك باقتىبايەۆ.
بۇعان دەيىن 23 ساۋىردە قىزىلساي تابيعي پاركىنىڭ اۋماعىندا زاڭسىز اڭ اۋلاعان ءتورت قارۋلى ادام ۇستالعانى حابارلانعان. اقتاۋ قالاسى تۇرعىندارىنىڭ ايتۋىنشا، ۇستالعانداردىڭ ەكەۋى ماڭعىستاۋ اۋدانىنىڭ ۋچاسكەلىك پوليسيا ينسپەكتورلارى بولعان.
پىكىر قالدىرۋ