ءماجىلىس ءتوراعاسى نۇرلان نىعماتۋلين قازاقستاندىقتاردى حالىقتار دوستىعىنىڭ، بىرلىكتىڭ جانە بەيبىتشىلىكتىڭ سيمۆولىنا اينالعان 1 مامىر مەرەكەسىمەن قۇتتىقتادى.

– بارشا قازاقستاندىقتاردى ەلىمىزدىڭ تاتۋلىعى مەن تۇتاستىعىن بەينەلەيتىن «بىرلىك كۇنى» مەرەكەسىمەن قۇتتىقتايمىن. كوپۇلتتى حالىقتىڭ ىرىسى مەن ىنتىماقتاستىعى جانە بەيبىت ءومىرى – ءبىزدىڭ باستى بايلىعىمىز. سوندىقتان، وسىنداي ايتۋلى مەيرام ۇلتتار اراسىنداعى دوستىقتى ودان ءارى تەرەڭدەتە تۇسەدى، – دەدى نۇرلان نىعماتۋلين.

وسى رەتتە، ءماجىلىس ءتوراعاسى ەلباسى نۇرسۇلتان ءابىش ۇلى نازاربايەۆتىڭ تاۋەلسىزدىك العان جىلداردان باستاپ، ءارقاشان حالىقتىڭ بەرەكە-بىرلىگىنە، قاۋىپسىزدىگىنە، تۇراقتىلىعى مەن تىنىشتىعىنا باسا نازار اۋدارىپ، قوعامدىق كەلىسىم مەن ساياسي تۇراقتىلىقتىڭ نەگىزىن قالاعانىن اتاپ ءوتتى.

سونىمەن قاتار، نۇرلان نىعماتۋلين بۇگىندە مەملەكەت باسشىسى قاسىم-جومارت كەمەل ۇلى توقايەۆ وسى باعىتتى ودان ءارى جالعاستىرىپ كەلە جاتقانىن ايتىپ، بارلىق قازاقستاندىقتارعا، ءاربىر وتباسىنا باق-بەرەكە، مولشىلىق، ەلىمىزگە تىنىشتىق تىلەدى.

ءماجىلىستىڭ باسپا ءسوز قىزمەتى