الماتى وبلىسىندا جۇك كولىگى جەڭىل كولىكپەن سوقتىعىسىپ، سالدارىنان ءبىر ادام قايتىس بولدى. وقىس وقيعانىڭ ۆيدەوسى ءالەۋمەتتىك جەلىدە جاريالاندى.
جول اپاتى 4 مامىر كۇنى الماتى-كوكپەك-كوكتال تاسجولىنىڭ 24ء-شى شاقىرىمىندا ساعات 11:45 شاماسىندا بولعان. Toyota Camry جەڭىل كولىگىنىڭ 23 جاستاعى جۇرگىزۋشىسى شىعىس باعىتتا كەلە جاتىپ، كولىكتى باسقارا الماي، قارسى جولاققا شىعىپ كەتكەن. ناتيجەسىندە HOWO جۇك كولىگىمەن سوقتىعىسىپ، Toyota كولىگىنىڭ 32 جاستاعى جولاۋشىسى العان جاراقاتتارىنان وقيعا ورنىندا قايتىس بولدى. ال ءتۇرلى دەنە جاراقاتىن العان كولىك جۇرگىزۋشىسى تالعار ورتالىق اۋداندىق اۋرۋحاناسىنا جەتكىزىلدى.
اتالعان وقيعا بويىنشا قىلمىستىق كودەكستىڭ 345-بابى 3-بولىگىنە سايكەس (ابايسىزدا ادام ولىمىنە اكەپ سوقتىراتىن جول قوزعالىسى ەرەجەلەرىن بۇزۋ) سوتقا دەيىنگى تەرگەۋ باستالىپ، ساراپتاما تاعايىندالدى.
پىكىر قالدىرۋ