ماجىلىستەگى زاڭناما جانە سوت-قۇقىقتىق رەفورما كوميتەتى "قازاقستان رەسپۋبليكاسىنداعى سايلاۋ تۋرالى" قازاقستان رەسپۋبليكاسىنىڭ كونستيتۋسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى" كونستيتۋسيالىق زاڭ جوباسىن ءماجىلىستىڭ جالپى وتىرىسىنىڭ تالقىلاۋىنا ۇسىندى.

وعان ساي، اۋداندىق ماڭىزى بار قالا، اۋىل، كەنت، اۋىلدىق وكرۋگ اكىمىن سايلاۋدى تاعايىنداۋ، وعان قويىلاتىن تالاپتار، اتالعان لاۋازىمدارعا كانديداتتاردى ۇسىنۋ ءتارتىبى بولىگىندە ۇسىنىستار ەنگىزىلەدى. وسىعان بايلانىستى، زاڭ جوباسىندا ساياسي پارتيالاردىڭ اكىمگە كانديداتتار ۇسىنۋى دا، ازاماتتاردىڭ ءوزىن-وزى ۇسىنۋى دا كوزدەلەدى، بۇل رەتتە ءوزىن-وزى ۇسىنعان ادام ءوزىن قولداۋ ءۇشىن ءتيىستى قول سانىن جيناۋعا ءتيىس.

اكىمگە كانديداتتاردى قولداۋعا قول جيناۋ ءتارتىبى، ولاردى تىركەۋ، كانديداتۋرانى الىپ تاستاۋ، كانديدات ۇسىنۋ تۋرالى شەشىمنىڭ كۇشىن جويۋ، تىركەۋ مەرزىمى اياقتالعاننان كەيىن اكىمگە كانديداتتار ۇسىنۋ ءتارتىبى، اكىمدى سايلاۋ كەزىندە داۋىستاردى ساناۋ، وسى سايلاۋدىڭ قورىتىندىلارىن انىقتاۋ جانە جاريالاۋ ءتارتىبى بەلگىلەنەدى.

سونداي-اق بارلىق دەڭگەيدەگى سايلاۋدا بەرىلەتىن بيۋللەتەندەرگە "بارىنە قارسىمىن" باعانى ەنگىزىلەدى، سونداي-اق ساياسي پارتيالار ءۇشىن پارلامەنت ماجىلىسىنە ءوتۋدىڭ شەگى 7 پايىزدان 5 پايىزعا دەيىن تومەندەتىلەدى.

– بۇل شارا سايلاۋعا قاتىساتىن كانديداتتىڭ نەمەسە ساياسي پارتيانىڭ ەشقايسىسىنا قاناعاتتانبايتىن ازاماتتارعا ءوز پىكىرىن بىلدىرۋگە مۇمكىندىك بەرەدى. باياندالعاننىڭ نەگىزىندە كوميتەت زاڭ جوباسىن قازاقستان رەسپۋبليكاسى پارلامەنتى ءماجىلىسىنىڭ جالپى وتىرىسىنىڭ تالقىلاۋىنا ەنگىزۋگە بولادى دەپ ەسەپتەيدى، – دەدى كوميتەت ءتوراعاسى قانات مۋسين.