رەسەيدىڭ سىرتقى ىستەر ءمينيسترى سەرگەي لاۆروۆ "حابار اگەنتتىگىنىڭ" باسقارما ءتوراعاسى ەرلان بەكحوجينگە بەرگەن سۇحباتىندا رەسەي دۋماسى دەپۋتاتتارىنىڭ "قازاقستان تەرريتورياسى رەسەي تاراپىنان جاسالعان سىي" دەگەن مازمۇنداعى داۋلى مالىمدەمەسىنە پىكىر ءبىلدىردى.

– ساياساتكەرلەر مانسابىن ءارتۇرلى جاسايدى. سەنساسيالىق مالىمدەمەگە قۇمارلارى بار. قوعامدا پىكىر تۋعىزاتىن جايتتاردى كوتەرىپ، ەستە ساقتالىپ قالعىسى كەلەدى. "باستىسى، گازەتتىڭ العاشقى بەتىنە شىقساق بولدى" دەگەندەي. ءبىراق رەسەي فەدەراسياسىنىڭ قازاقستانعا دەگەن كوزقاراسىن ايقىندايتىن ناعىز كوشباسشىلار مۇنداي قادامعا بارمايدى. ەشقاشان ولاي جاسامايدى دا. ويتكەنى ول وداقتاستىعىمىزعا، ارادا جاسالعان كەلىسىمدەرگە ساي كەلمەيدى. ءبىز ءبىر-بىرىمىزدىڭ تاۋەلسىزدىگىمىز، اۋماقتىق تۇتاستىقتىعىمىز، ساياسي كوزقاراستارىمىزدى سىيلاۋىمىز كەرەك. قارىم-قاتىناستى مەملەكەت باسشىلارى قول قويعان قۇجاتتار، پارلامەنتتەر بەكىتكەن زاڭدار، حالىقارالىق قۇقىق نورمالار نەگىزىندە جالعاستىرامىز. وسىنداي ارانداتۋشىلىق باعىتتاعى مالىمدەمەلەر دەموكراتيانىڭ ءبىر قۇندىلىقتارىنا اينالىپ كەتتى. ولار تەك بەلگىلى ءبىر ورتادا تالقىلانىپ قالۋى قاجەت. ناقتى ساياساتقا كەلگەندە ارانداتۋشىلىق بولمايدى دەپ سەندىرەمىن، – دەدى لاۆروۆ.

بىلتىر جەلتوقساندا رەسەي مەملەكەتتىك بىرنەشە دەپۋتات قازاقستان تەرريتوريا رەسەي تاراپىنان جاسالعان سىيلىق ەكەنىنە مەڭزەپ، ونى رەسەيگە قايتارۋى كەرەكتىگى تۋرالى مالىمدەمە جاساعان.

بۇل مالىمدەمەلەر قازاقستان قوعامىندا قىزۋ تالقىلانىپ، ازاماتتاردىڭ نارازىلىعىن تۋدىردى. باستاپقىدا قازاقستان سىرتقى ىستەر مينيسترلىگى نارازىلىق نوتاسىن جاريالاسا، ارتىنشا پرەزيدەنت ق.توقايەۆ 2020 جىلعى جاڭا جىلدىق قۇتتىقتاۋىندا، سونداي-اق 2021 جىلعى 5 قاڭتاردا جاريالانعان "تاۋەلسىزدىك بارىنەن قىمبات" اتتى ماقالاسىندا "ءبىز ۇلتتىق مۇددەنى اسپەن دە، تاسپەن دە قورعاۋعا دايىن بولۋىمىز قاجەت" دەپ داۋلى مالىمدەمەلەرگە جاۋاپ بەرگەن.