بۇگىن NurOtan پارتياسى ءتوراعاسىنىڭ ورىنباسارى باۋىرجان بايبەكتىڭ بەلسەندى جانبولات ماماي مەن ي.يمانبايەۆاعا قاتىستى بەرگەن تالاپ ارىزىنا سايكەس ازاماتتىق ءىس بويىنشا ونلاين سوت پروسەسى ءوتتى.
ساياساتتانۋشى باۋىرجان سەرىكبايەۆ ج. مامايدىڭ قولىندا ءىلىپ الار ناقتى دەرەك جوق ەكەنىن ايتادى.
– سوت ءجۇرىپ جاتىر. ارينە، مۇندا قۇرعاق ءسوز بەن ەموسياعا ورىن جوق. ءبارى دە دالەلدى، تياناقتى، ايعاقتى بولۋى ءتيىس. سونىمەن، ەكى تاراپتىڭ دا ءوز ءسوزىن دالەلدەيتىن ناقتى فاكتىلەردى ۇسىنۋى تالاپ ەتىلدى. بايبەك مامايدىڭ وزىنە تاققان ايىپتاۋلارىن تەرىسكە شىعاراتىن ناقتى قۇجاتتاردى ۇسىندى. ەندى سوت "مامايعا دا ايتقان سوزدەرىڭدى دايەكتەيتىن ناقتى فاكتىلەر مەن دالەلدەرىڭدى ورتاعا سال" دەگەن تالاپ قويدى. مىنە، قىزىق وسى جەردە باستالدى. ماماي مۇنى كۇتپەسە كەرەك. قولىندا ءىلىپ الار ناقتى دەرەك، تاققان ايىپتاۋلارىن نەگىزدەيتىن انىق فاكتىلەر جوق. "دەباتقا تۇسەم" دەپ ءبىر، ماسەلەنى ساياسيلاندىرماق بولىپ ەكى تىرىسىپ، ارى-بەرى تارتىپ كورىپ ەدى، مۇنىسىنان تۇك شىقپادى. "سۋعا كەتكەن تال قارمايدى" دەگەندەي، ەندىگى بار تاپقانى "سوت نەگە قازاق تىلىندە ەمەس، ورىس تىلىندە جۇرەدى؟" دەپ شىعا كەلدى، – دەپ جازدى ول.
سەرىكبايەۆ بايبەكتىڭ قازاقشاسىنا كۇمان كەلتىرگەندەردىڭ پىكىرىنە دە ايتارى بارىن جەتكىزدى.
– بالكىم، بايبەك اقىن مۇحتار نيازوۆتاي توگىلدىرىپ، ولەڭدەتىپ سويلەي المايتىن شىعار. ءبىراق ەشكىم دە بايبەكتى جۇمىسقا قاجەتتى دەڭگەيدە قازاق ءتىلىن جەتىك ءبىلىپ، جاتىق سويلەي المايدى دەپ سىن تاعا المايدى. ءبىر قازاقتاي قازاق ءتىلىن مەڭگەرگەن. بۇل رەتتە مامايدىڭ جوق جەردەن ىلىك ىزدەپ، تىلگە جابىسۋى مۇلدەم قيسىنسىز. ونىڭ قازاق ءتىلىن العا تارتىپ، جاناشىر بولا قالۋى ارزان ۇپاي جيناۋ، – دەدى ساياساتتانۋشى.
بۇدان بولەك ول باۋىرجان بايبەك الماتى اكىمى بولىپ تۇرعاندا قازاق ءتىلى مەن ۇلتتىق مۇراعا قاتىستى كوپتەگەن جۇمىس اتقارعانىن ايتىپ، سولاردىڭ ءبىرقاتارىن توقتالادى.
ول "بولاشاق" قورىنىڭ قولداۋىمەن شەتەلدىك 40 شاقتى ۇزدىك ءمۋلتفيلمدى قازاق تىلىنە دۋبلياجداۋدى، الماتىدا "الاتاۋ" ءداستۇرلى ونەر تەاترىنىڭ اشىلۋىن، 400-دەي كوشەنىڭ، ىقشاماۋدانداردىڭ اتاۋىن قازاقشاعا اۋىستىرعانىن، جەراستى وتكەلدەرىن جوندەپ، ونى ويۋ-ورنەكپەن اسپەتتەپ، قازاق كۇيلەرىن كۇمبىرلەتىپ قويعانىن، ايتىس پەن ۇلتتىق سپورت تۇرلەرىن دامىتۋعا "Nur Otan" پارتياسىنىڭ قولداۋ كورسەتىپ جاتقانىن تىزبەكتەيدى.
ال قوعام بەلسەندىسى جانبولات ماماي بۇگىنگى سوت پروسەسىنەن كەيىن الەۋمەتتىك جەلىدەگى پاراقشاسىندا جازبا جاريالاپ، "سوت بايبەكتىڭ جاعىندا ەكەنى انىق" دەپ مالىمدەدى.
– بارا-بارا بايبەكتىڭ سوتى ءبىزدى قاتىستىرماي-اق سوتتاپ جىبەرە مە دەپ وتىرمىن. جاڭا عانا ءبىزدىڭ قورعاۋشىمىزعا اۋەزوۆ اۋداندىق سوتى سارتايەۆا ر. حابارلاسىپ، ساراپتاما وتكىزۋ تۋرالى شەشىم قابىلداعانىن جەتكىزگەن.
نەگىزى، بۇل جەردە جاۋاپكەر ءبىز ەمەسپىز بە؟ نەگە ءبىزدى قاتىستىرمايدى سوتقا؟ شەشىمدى نەگە ءبىز تىڭدامايمىز؟ سوت بايبەكتىڭ جاعىندا ەكەنى انىق ءقازىردىڭ وزىندە. ونىڭ شەشىمى: سوت ساراپتاماسىن تاعايىنداۋ جانە ءبىزدىڭ ارىزىمىز بەلگىلى مامان قارىمساقوۆانى قاتىستىرۋدان باس تارتتى، – دەدى ماماي.
ول ءوز سوزىندە "سوت پروسەسىنە 10-عا جۋىق جۋرناليست قاتىسا المادى، ءىس جۇزىندە اشىق سوت پروسەسى جابىق تۇردە ءجۇرىپ جاتىر" دەدى.
بايبەك-ماماي تەكەتىرەسى بەلسەندىنىڭ NurOtan پارتياسى ءتوراعاسىنىڭ ورىنباسارى تۋرالى ۆيدەوماتەريال جاريالاۋىنان باستالعان. جانبولات ماماي ول جەردە UZUN Qulaq تەلەگرام كانالىنداعى، اشىق دەرەككوزدەردەگى، ءبىرقاتار باسپا ءسوز بەتتەرىندە جاريالانعان اقپاراتتاردى نەگىزگە الىپ، بايبەكتى "بيۋدجەت اقشاسىن "جەپ" ميللياردەر اتاندى" دەپ ايىپتايدى. بۇعان جاۋاپ رەتىندە بايبەك NurOtan پارتياسىنىڭ ەكس-دەپۋتاتى، بۇگىندە youtube جەلىسىندە ۆيدەوبلوگ تۇسىرۋمەن اينالىسىپ جۇرگەن تاڭىربەرگەن بەردوڭعارعا سۇحبات بەرىپ، وپپوزيسيونەردىڭ ايىپتارىن تەرىستەپ، ونى سوتقا بەرەتىنىن ءمالىم ەتتى. مۇنان سوڭ ماماي قازاقستان سوتى ءوزىن جىعىپ بەرەتىنىن ءمالىم ەتىپ، بايبەكتى تىكەلەي ەفير رەجيمىندە اشىق دەباتقا شىعۋعا شاقىردى. ۇزاماي NurOtan پارتياسى اتىنان ءماجىلىس دەپۋتاتى اتانعان ەلنۇر بەيسەنبايەۆ Qazaqstan ارناسىنىڭ ءجۋرناليسى نارتاي ارالباي ۇلىنىڭ youtube ارناسىنا سۇحبات بەرىپ، مامايدىڭ بايبەكتى دەباتقا شاقىرۋىن سىناپ، مامايدىڭ ءوزىن دەباتقا شاقىرادى. بۇعان جاۋاپ رەتىندە ماماي دەباتقا باسقا-باسقانى ەمەس، ءوزىنىڭ سوزدەرىن "وتىرىك" دەگەن، سوتقا بەرەتىنىن ايتقان بايبەكتى شاقىرعانىن ءمالىم ەتەدى.
پىكىر قالدىرۋ