قازاقستان مۇسىلماندارى ءدىني باسقارماسىنىڭ قاجىلىق ءبولىمى ساۋد ارابياسى كورولدىگىنىڭ دەنساۋلىق ساقتاۋ مينيسترلىگى 2021 جىلعى قاجىلىق ماۋسىمىنا دايىندىق شەڭبەرىندەگى ارنايى تالاپتاردى جاريالاعانىن حابارلادى.
وعان ساي، "قاجىلىق-2021" ماۋسىمىنداعى قاجىلار سانى 60 مىڭ ادامعا بەلگىلەنگەن. قاجىلىق جاساۋعا 18-60 جاستار ارالىعىنداعى ازاماتتار ءوتىنىش بەرە الادى.
قاجىلىققا بارعىسى كەلەتىندەردەن ساۋد ارابياسىندا رەسمي بەكىتىلگەن ۆاكسينا تۇرلەرىنىڭ (Pfizer-BioNTech، AstraZeneca، Johnson&Johnson جانە Moderna) ەكى دوزاسىن قابىلداۋ تالاپ ەتىلەدى. ەكىنشى دوزانى كورولدىككە بارۋدان 14 تاۋلىك بۇرىن سالدىرۋ مىندەتتى. شەت ەلدەردەن كەلگەن ازاماتتارعا قاجىلىق قۇلشىلىعىنا قاتىسى جوق وزگە ايماقتارعا بارۋىنا تىيىم سالىنادى.
"سونىمەن قاتار، ءار قاجى جوعارىدا اتالعان ۆاكسينالاردىڭ ءبىرىن سالدىرعانى تۋرالى ءوز ەلىنىڭ قۇزىرەتتى ورگاندارىنان انىقتاما الۋى جانە ونى ساۋد ارابياسىنىڭ شەت مەملەكەتتەردەگى ەلشىلىكتەرىندە زاڭداستىرۋى كەرەك. بۇعان قوسىمشا ءار قاجىدان كورولدىككە كەلگەن كەزدە 72 ساعاتقا جارامدى تەرىس ناتيجەلى پتر-تەست انىقتاماسىن دا كورسەتۋ تالاپ ەتىلەدى.
قاجىلار مەككە ايماعىندا ءبىر ورىننان ەكىنشى ورىنعا كوشكەن ۋاقىتتا بارلىق دەنساۋلىق ساقتاۋ شارالارىن قاتاڭ ساقتاۋى ءتيىس. سونداي-اق بەكىتىلگەن ەرەجەلەرگە تولىق باعىنۋ قاجەت.
الايدا "قاجىلىق-2021" ماۋسىمىندا قانداي مەملەكەتتەن قانشا ادام شاقىرىلاتىنى جايلى جاڭالىقتى ساۋديا بيلىگى ازىرگە تاراتپاي وتىر. قاجىلىق ماۋسىمىنا قاتىستى جاڭا اقپاراتتار مەن قوسىمشا تالاپتار بولعان جاعدايدا قوسىمشا حابارلانادى" دەلىنگەن اقپاراتتىق حابارلامادا.
بيىل "قاجىلىق-2021" 17 شىلدەدە باستالادى.
2021 جىلعى 26 مامىرداعى مالىمەت بويىنشا قازاقستاندا 2 035 781 ادام ۆاكسينا سالدىرعان. ولاردىڭ دەنى نەگىزىنەن رەسەيلىك "سپۋتنيك V" جانە وتاندىق QazVac ۆاكسينالارىن سالدىرۋدا.
پىكىر قالدىرۋ