پرەزيدەنت قاسىم-جومارت توقايەۆ سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى مارات احمەتجانوۆتى قابىلدادى. بۇل تۋرالى اقوردا سايتى حابارلادى.
پرەزيدەنت سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسىنا مەملەكەتتىك ورگاندار مەن باسقا دا ۇيىمداردىڭ سىبايلاس جەمقورلىققا قارسى ءىس-قيمىلدارىن ۇيلەستىرۋ جونىندەگى جۇمىستاردى كۇشەيتۋدى تاپسىرعان. بۇل رەتتە قاسىم-جومارت توقايەۆ وزدەرىنىڭ قاراماعىنداعى قۇرىلىمداردا سىبايلاس جەمقورلىق كورىنىستەرىنىڭ الدىن الۋ ءۇشىن ءتيىستى شارالار قابىلدامايتىن باسشىلارعا ىقپال ەتۋدىڭ پارمەندى تەتىكتەرىن زاڭنامالىق تۇرعىدان بەكىتۋ كەرەك ەكەنىن اتاپ ءوتتى.
"قاسىم-جومارت توقايەۆتىڭ تاپسىرماسى بويىنشا سىبايلاس جەمقورلىققا قارسى ءىس-قيمىل تۇرعىسىنان مينيسترلەر مەن اكىمدەر قىزمەتىنىڭ تيىمدىلىگىن باعالاۋدىڭ ناقتى تالاپتارى ازىرلەنەدى. بۇل ماسەلەدە ەنجارلىق تانىتقان باسشىلار جاۋاپقا تارتىلادى" دەلىنگەن رەسمي سايت حابارلاماسىندا.
مەملەكەت باسشىسى بيۋدجەت قارجىسىن جۇمساۋدىڭ اشىقتىعىن ودان ءارى ارتتىرۋدىڭ ماڭىزدىلىعىن اتاپ ءوتىپ، سىبايلاستىقتىڭ الدىن الۋ شارالارىنا باسىمدىق بەرۋ تۋرالى ايتتى.
سونداي-اق قىلمىستىق جولمەن الىنعان قاراجات پەن اكتيۆتەردى ىزدەستىرۋگە جانە قايتارۋعا باسىمدىق بەرە وتىرىپ، سىبايلاس جەمقورلىققا جاتاتىن قىلمىستار جاساعانى ءۇشىن جازانىڭ بۇلتارتپاس قاعيداتىن مۇلتىكسىز ساقتاۋ قاجەت ەكەنىنە نازار اۋداردى.
پىكىر قالدىرۋ