"اق جول" دەموكراتيالىق پارتياسى ءار بالا دۇنيەگە كەلگەن سايىن يپوتەكانى 25 % جەڭىلدەتۋدى سۇرايدى. ۆيسە-مينيستر رومان سكلياردىڭ اتىنا فراكسيانىڭ ءتيىستى دەپۋتاتتىق ساۋالىن ەرلىك ءومىرعالي باياندادى.
دەپۋتاتتىڭ ايتۋىنشا، 2020-2025 جىلدارعا ارنالعان "نۇرلى جەر" تۇرعىن ۇي-كوممۋنالدىق دامۋ باعدارلاماسىنداعى جەڭىلتەتىلگەن شارتتار اكىمدىكتەردە كەزەكتە تۇرعاندارعا عانا قولدانىلادى. ال كەزەككە تەك مۇگەدەكتەر، كوپ بالالى وتباسىلار، ارداگەرلەر نەمەسە جەتىمدەر سەكىلدى بەلگىلى ءبىر ساناتتاعى ازاماتتار عانا قويىلاتىنىن اتاپ وتكەن ول "وتباسىن جاڭادان قۇرعان، قول-اياعى ساۋ، ءبىراق ءالى ءوز ۇياسىنا قاراجات جيناپ ۇلگەرمەگەن جاستار نە ىستەۋى كەرەك؟ ولار قاشان بالالى بولادى؟ كوپ بالالى وتباسىلار بىردەن پايدا بولمايدى عوي" دەپ جاستاردىڭ باسپاناعا قولجەتىمدىلىگىن ارتتىرۋ ماسەلەسىنە نازار اۋداردى.
– ولار پاتەرگە اقشا جيناپ بولعاندا جاستارى 40-تان اسىپ قالادى، بۇل جاستا ايەلدەردىڭ ءسابيلى بولۋ قابىلەتى دە تومەندەيدى، دارىگەرلەردىڭ ايتۋىنشا، ەرلەر مەن ايەلدەردىڭ ۇشتەن ءبىرى 40 جاستان كەيىن جانە ودان دا ەرتەرەك بەدەۋلىككە ۇشىرايدى. قازىرگى جاعدايدا، مەملەكەتتىڭ نەمەسە داۋلەتتى اتا-انانىڭ قولداۋىنسىز جاس وتباسىلار 40 جاسقا دەيىن ءوز كۇشىمەن باسپانا الا المايدى. وسىعان بايلانىستى، "اق جول" دەموكراتيالىق پارتياسى جاس وتباسىلار ءۇشىن ءار بالا تۋعان كەزدە 25% مولشەرىندە يپوتەكالىق كرەديتتەر بويىنشا پايىزدىق مولشەرلەمەلەردى سۋبسيديالاۋدى ەنگىزۋ تۋرالى 2013 جىلدا ايتىلعان ۇسىنىسىنا قايتا ورالادى. پايىزدىق مولشەرلەمەلەردى سۋبسيديالاۋ بيزنەستى كرەديتتەۋ كەزىندە مەملەكەتتىك جانە جەكە مۇددەلەردى ۇشتاستىرۋ قۇرالى رەتىندە ءوزىن جاقسى جاعىنان كورسەتتى. بۇل تابىستى تاجىريبەنى الەۋمەتتىك باعدارلامالارعا دا تاراتۋ كەرەك دەپ سانايمىز. سوندا ۇلكەن وتباسى 10 جىل كەزەكتى كۇتپەي، 4ء-شى بالا تۋعان كەزدە بىردەن پايىزسىز باسپانالى بولادى، ال ەكى بالاسى بار وتباسى مولشەرلەمەنىڭ جارتىسىن عانا تولەيدى. بۇل رەتتە، مەملەكەت تولەيتىن پايىزداردى ەسەپتەمەي-اق وتباسى ءۇشىن قارىزدىڭ نەگىزگى سوماسىن بىرتىندەپ وتەۋدى قالدىرۋعا بولادى. بۇل شارا جاس وتباسىلاردى بىردەن بالالى بولۋعا ىنتالاندىرۋعا مۇمكىندىك بەرەدى، ال ەكىنشى دەڭگەيدەگى بانكتەر يپوتەكانى بەلسەندى تۇردە كرەديتتەۋگە مۇمكىندىك الادى، – دەيدى دەپۋتات.
ماجىلىستەگى "اق جول" فراكسياسىنىڭ مۇشەلەرى ۇسىنىلىپ وتىرعان ءتاسىل تۇرعىن ۇيگە بولا اجىراسۋ جاعدايلارى ءورشىپ بارا جاتقان ساتتە وتباسى ينستيتۋتىن نىعايتادى دەپ سانايدى.
پىكىر قالدىرۋ