گونكونگتەگى سوڭعى جارتى عاسىرداعى ەڭ جويقىن ورتتەن قازا تاپقاندار سانى كەمىندە 55 ادامعا جەتتى، تاعى 279 ادام ءىز-تۇزسىز جوعالعاندار قاتارىندا.

تاي پو اۋدانىنىڭ سولتۇستىگىندەگى بيىك تۇرعىن ءۇي كەشەنىندە تۇتانعان ءورت 24 ساعاتتان استام ۋاقىت وتكەنىنە قاراماستان تولىق سوندىرىلمەدى. جەتى بلوكقا تاراعان جالىننىڭ سوڭعى ءۇش بلوگىندا ءورت “باقىلۋعا الىندى” دەپ حابارلادى بيلىك وكىلدەرى.

پوليسيا قۇرىلىس كومپانياسىنىڭ ءۇش جەتەكشىسىن — ەكى ديرەكتور مەن ءبىر ينجەنەرلىك كەڭەسشىنى — ابايسىزدا ادام ولىمىنە اكەلدى دەگەن كۇدىكپەن قاماۋعا الدى. قۇتقارۋ توپتارى ءورت تولىق سوندىرىلگەن ايماقتارداعى پاتەرلەردى بىر-بىرلەپ تەكسەرىپ جاتىر. قازا بولعاندار سانىنىڭ ءالى دە ءوسۋى مۇمكىن ەكەنى ايتىلدى.

اۋرۋحانالاردا شامامەن 76 ادام جاتىر، ولاردىڭ 15ء-ى اۋىر حالدە، 28ء-ى — جاعدايى وتە اۋىر.

Wang Fuk Court تۇرعىن ءۇي كەشەنى سەگىز بلوكتان تۇراتىن، شامامەن 2 000 پاتەرى بار كەشەن بولىپ تابىلادى. ءورت شىققان كەزدە عيماراتتاردا جوندەۋ جۇمىستارى جۇرگىزىلىپ جاتقان. ساراپشىلاردىڭ ايتۋىنشا، بامبۋكتەن جاسالعان قۇرىلىستىق ماتەريالدار جالىننىڭ بلوكتار اراسىندا تەز تارالۋىنا سەبەپ بولعان.

گونكونگ باس اتقارۋشىسى دجون لي بۇل وقيعانى “اسا ءىرى اپات” دەپ اتاپ، 7 جەلتوقساندا ءوتۋى ءتيىس جالپى سايلاۋدى كەيىنگە قالدىرۋ مۇمكىندىگىن مالىمدەدى.