گونكونگتاعى جويقىن ورتتەن كەيىن قايىرىمدىلىق باستامالارى كۇشەيدى: تەحنولوگيالىق الپاۋىتتار دونورلىق جاريالادى. ال، بيلىك كەڭ اۋقىمدى تەكسەرىس باستادى

گونكونگتاعى سوڭعى جارتى عاسىرداعى ەڭ ءىرى ورتتەن كەيىن قىتايدىڭ تەحنولوگيالىق جانە كوممەرسيالىق الپاۋىتتارى زارداپ شەككەندەرگە كومەك كورسەتەتىنىن جاريالادى. ساعات سايىن قازا تاپقاندار سانى ءوسىپ جاتقان قايعىلى جاعداي كەزىندە ايماقتىڭ بيزنەس قاۋىمداستىعى مەن تۇرعىندارى دا قايىرىمدىلىق شارالارىنا بەلسەندى ارالاسا باستادى.

تەحنولوگيالىق كومپانيالار ميلليونداعان كومەك ۇسىندى

بىرنەشە ءىرى قىتايلىق كومپانيالار قارجىلاي قولداۋ كورسەتەتىنىن مالىمدەدى.

• Alibaba Group (Taobao پلاتفورماسىنىڭ يەسى) – 20 ميلليون گونكونگ دوللارى كولەمىندە كومەك بەرەدى.

•  Tencent، Xiaomi جانە ByteDance ءارقايسىسى – 10 ميلليون گونكونگ دوللارى كولەمىندە قايىرىمدىلىق جاسايتىنىن حابارلادى.

• سپورت كيىمدەرى برەندى Anta – 10 ميلليون گونكونگ دوللارى كولەمىندە قاراجات جانە قوسىمشا 20 ميلليون گونكونگ دوللارى تۇراتىن سۋىق اۋا رايىنا ارنالعان كيىمدەر بولمەك.

تۇرعىندار دا بەلسەندى تۇردە كومەك كورسەتۋدە

ورتتەن جۇزدەگەن ادامنىڭ باسپاناسىز قالۋىنا بايلانىستى كوپتەگەن گونكونگتىقتار ءوز ەركىمەن ازىق-تۇلىك، كيىم جانە قاجەتتى زاتتار جيناپ، ارنايى ۇيىمداستىرىلعان قابىلداۋ ورتالىعىنا جەتكىزۋدە.

بيلىك جوندەۋ ءجۇرىپ جاتقان تۇرعىن ۇيلەرگە تەكسەرىس جۇرگىزەدى

گونكونگتىڭ باس اتقارۋشىسى دجون لي Facebook ارقىلى مالىمدەمە جاساپ، قالا بيلىگى "ءىرى جوندەۋ جۇمىستارى ءجۇرىپ جاتقان بارلىق تۇرعىن ءۇي كەشەندەرىن" تەكسەرەتىنىن ايتتى. تەكسەرىس بارىسىندا قالقالار مەن قۇرىلىس ماتەريالدارىنىڭ قاۋىپسىزدىگى باعالانادى.

سونىمەن قاتار بيلىك:

• تۇرعىنداردى قۇتقارۋدى جالعاستىراتىنىن،

• زارداپ شەككەندەرگە ۋاقىتشا باسپانا،

• قارجىلاي كومەك،

• الەۋمەتتىك قىزمەتكەرلەردىڭ قولداۋىن قامتاماسىز ەتەتىنىن مالىمدەدى.

«ءبىزدىڭ ۇكىمەت بۇكىل گونكونگ حالقىن قولداۋعا دايىن. ءبىز بۇل قيىندىقتى بىرگە ەڭسەرەمىز»، – دەدى لي.

زارداپ شەككەندەر شۇعىل باسپانالارعا ورنالاستىرىلۋدا

ورتتەن امان قالعان كوپتەگەن تۇرعىندار جاقىن ماڭداعى ۋاقىتشا ورتالىقتارعا جەتكىزىلدى. الايدا وقيعا كەزىندە Wang Fuk Court كەشەنىندە ناقتى قانشا ادام بولعانى ءالى بەلگىسىز.

2021 جىلعى ساناققا سايكەس، بۇل تۇرعىن ءۇي كەشەنىندە شامامەن 4 600 ادام تۇرعان.

قۇتقارۋ جۇمىستارى جالعاسۋدا: "ءبىز ءالى ۇمىتتەنەمىز"

ورتتەن كەيىنگى جاعداي اۋىر ءارى كۇردەلى بولىپ وتىر. ءورت ءسوندىرۋ دەپارتامەنتىنىڭ وكىلدەرى باسپا ءسوز ءماسليحاتىندا:

«ءبىز ءالى بەرىلگەن جوقپىز. ءالى دە جارالىلاردى قۇتقارۋ مۇمكىندىگىن جوققا شىعارمايمىز»، – دەدى.

قۇتقارۋ توبىنىڭ باستى قيىندىقتارى:

• وتە جوعارى تەمپەراتۋرا،

• پاتەرلەردىڭ تار جانە ادام تولى ءىشى،

• بامبۋك قۇرىلىمدارىنىڭ قۇلاۋ ءقاۋپى.

«قيىن، ءبىراق جۇمىس قازىرگە دەيىن جاقسى ءجۇرىپ جاتىر»، – دەدى دەپارتامەنت وكىلى.