جوعارعى سوت سۋدياسى لاريسا شەپەليەۆا وتستاۆكاعا كەتۋىنە بايلانىستى قىزمەتىنەن بوساتىلدى. بۇل تۋرالى پارلامەنت سەناتى وتىرىسىندا جوعارعى سوت كەڭەسىنىڭ ءتوراعاسى تالعات دوناقوۆ مالىمدەدى.
– لاريسا شەپەليەۆا وتستاۆكاعا شىعۋعا نيەت ءبىلدىردى. قۇرمەتتى دەپۋتاتتار، جوعارعى سوتتىڭ سۋدياسى وتستاۆكاعا شىعۋىنا بايلانىستى قىزمەتىنەن بوساتۋ تۋرالى مەملەكەت باسشىسىنىڭ ۇسىنىمىن قولداۋدى سۇرايمىز، – دەدى ت. دوناقوۆ.
سەناتورلار ۇسىنىستى ءبىراۋىزدان قولداپ، داۋىس بەردى.
سەنات سپيكەرى ماۋلەن اشىمبايەۆ ۇزاق جىلدار بويى سوت جۇيەسىندە ەڭبەك ەتىپ، ەل دامۋىنا ۇلەس قوسقانى ءۇشىن لاريسا شەپەليەۆاعا العىس ايتتى.
