باۋىرجان بايبەك – جانبولات ماماي سوت پروسەسىندە ماماي بايبەك تالاپ ارىزىندا تۇرعىلىقتى مەكەنجايى رەتىندە ءوزىنىڭ ناقتى تۇراتىن ءۇيىنىڭ مەكەنجايىن ەمەس، NurOtan پارتياسى كەڭسەسىنىڭ مەكەنجايىن كورسەتكەنىن ايتتى.

بەلسەندى مۇنىڭ سەبەبىن باۋىرجان بايبەكتىڭ ءزاۋلىم سارايدا تۇراتىنىمەن، ونى كورسەتە المايتىنىمەن ءتۇسىندىردى.

ج.ماماي سونداي-اق ب.بايبەك ءوزىنىڭ بيزنەسىن وتباسى مۇشەلەرىنە – قارىنداسى، اتا-اناسىنىڭ اتىنا جازىپ قويعانىن، ول كاسىپكەرلىك نىساندار مەملەكەتتىك تاپسىرىستى ورىنداپ وتىرعانىن اتاپ ءوتتى.

وسى ساتتە سۋديا بەلسەندىنىڭ ءسوزىن ءبولىپ، مامايدىڭ ايتىپ جاتقاندارى داۋ تاقىرىبىنا سايكەس كەلمەيتىنىنە نازار اۋدارىپ، بايبەكتىڭ تالاپ ارىزىنداعى ناقتى ماسەلەلەر بويىنشا سويلەۋگە شاقىردى. ماماي بولسا، ايتىپ جاتقاندارى ءوزىنىڭ بۇعان دەيىنگى ايىپتاۋلارىن دالەلدەۋگە تىكەلەي بايلانىستى ەكەنىن، تاقىرىپتان اۋىتقىماعانىن جەتكىزىپ، سونىمەن قاتار سۋديا بايبەك وكىلىنىڭ ءسوزىن بولمەي، ءوزىن قايتا-قايتا توقتاتا بەرگەنىنە نارازىلىق ءبىلدىردى.

مۇنان سوڭ بەلسەندى بايبەكتىڭ تۋىستارىنىڭ كاسىبى تۋرالى جالعاستىرىپ، ايگۇل بايبەك (باۋىرجان بايبەكتىڭ اپكەسى) قۇرىلتايشىلىق ەتەتىن "Aray Media Group" كومپانياسى "دوس-مۇقاسان" توبى تۋرالى فيلم ءتۇسىرۋ ءۇشىن كينونى دامىتۋ قورىنان ەكى كەلىسىم-شارت بويىنشا 425 ميلليون تەڭگە قارجى العانىن جەمقورلىق ارەكەت دەپ اتايدى.

بايبەكتىڭ وكىلى بۇل قاراجات ەكى كەلىسىم-شارت ەمەس، ءبىر كەلىسىم-شارت اياسىندا ەكىگە ءبولىنىپ بەرىلگەنىن ءمالىم ەتتى.

مۇنان سوڭ جانبولات ماماي قازاق ۇلتتىق ۋنيۆەرسيتەتىنە تيەسىلى جەرلەردىڭ ساتىلۋىنا، كوكجايلاۋداعى اعاشتاردىڭ زاڭسىز وتالۋىنا باۋىرجان بايبەكتىڭ قاتىسى بارى تۋرالى ايتىپ، العاشقى ماسەلە بويىنشا جەر ماسەلەلەرى جونىندەگى زاڭگەر باقىتجان بازاربەك ارنايى ساراپتاما ازىرلەپ جاتقانىن، ەكىنشى ماسەلەگە قاتىستى جۋرناليست ۆاديم بورەيكونى كەزەكتى سوت وتىرىستارىنا كۋا رەتىندە شاقىرۋ تۋرالى جازباشا ءوتىنىش تۇسىرگەنىن ءمالىم ەتتى.

سونداي-اق ول باۋىرجان بايبەك الماتى قالاسىن باسقارىپ تۇرعان شاقتا قىتايدان اۆتوبۋس ساتىپ الۋ ىسىندە جەمقورلىق ارەكەتتەرگە جول بەرىلگەنىن، ول بويىنشا قىلمىستىق ءىس قوزعالعانىن، بۇعان ەكس-اكىمنىڭ قاتىسى بارىن ايتتى.

ال باۋىرجان بايبەكتىڭ مۇددەسىن قورعاپ جاتقان زاڭگەر ايجان تاشەنوۆا ەرلى-زايىپتىلاردىڭ ءسوزى مەن ءىسى ومىردە قابىسپايتىنىن ج.ماماي ءار سوزىندە ەۋروپالىق جانە حالىقارالىق ستاندارتتاردى مىسالعا كەلتىرەتىنى، ءسوز بوستاندىعى، زاڭ ۇستەمدىگى تۋرالى ءجيى ايتاتىنى جاي عانا بەتپەردە ەكەنىن ايتقان.